Read כֶּתֶר אֲרָם צוֹבָא - Tanah Aleppo Codex מיכה 1 Bible Online

מיכה 1 - כֶּתֶר אֲרָם צוֹבָא - Tanah Aleppo Codex bible

מיכה 1

¹א דבר יהוה אשר היה אל מיכה המרשתי בימי יותם אחז יחזקיה מלכי יהודה--אשר חזה על שמרון וירושלם

²ב שמעו עמים כלם הקשיבי ארץ ומלאה ויהי אדני יהוה בכם לעד אדני מהיכל קדשו

³ג כי הנה יהוה יצא ממקומו וירד ודרך על במותי (במתי) ארץ

⁴ד ונמסו ההרים תחתיו והעמקים יתבקעו כדונג מפני האש כמים מגרים במורד

⁵ה בפשע יעקב כל זאת ובחטאות בית ישראל מי פשע יעקב הלוא שמרון ומי במות יהודה הלוא ירושלם

⁶ו ושמתי שמרון לעי השדה למטעי כרם והגרתי לגי אבניה ויסדיה אגלה

⁷ז וכל פסיליה יכתו וכל אתנניה ישרפו באש וכל עצביה אשים שממה כי מאתנן זונה קבצה ועד אתנן זונה ישובו

⁸ח על זאת אספדה ואילילה אילכה שילל (שולל) וערום אעשה מספד כתנים ואבל כבנות יענה

⁹ט כי אנושה מכותיה כי באה עד יהודה--נגע עד שער עמי עד ירושלם

¹⁰י בגת אל תגידו--בכו אל תבכו בבית לעפרה עפר התפלשתי (התפלשי)

¹¹יא עברי לכם יושבת שפיר עריה בשת לא יצאה יושבת צאנן--מספד בית האצל יקח מכם עמדתו

¹²יב כי חלה לטוב יושבת מרות כי ירד רע מאת יהוה לשער ירושלם

¹³יג רתם המרכבה לרכש יושבת לכיש ראשית חטאת היא לבת ציון כי בך נמצאו פשעי ישראל

¹⁴יד לכן תתני שלוחים על מורשת גת בתי אכזיב לאכזב למלכי ישראל

¹⁵טו עד הירש אבי לך יושבת מרשה עד עדלם יבוא כבוד ישראל

¹⁶טז קרחי וגזי על בני תענוגיך הרחבי קרחתך כנשר כי גלו ממך {ס}