Read כֶּתֶר אֲרָם צוֹבָא - Tanah Aleppo Codex מיכה 2 Bible Online

מיכה 2 - כֶּתֶר אֲרָם צוֹבָא - Tanah Aleppo Codex bible

מיכה 2

¹א הוי חשבי און ופעלי רע על משכבותם באור הבקר יעשוה כי יש לאל ידם

²ב וחמדו שדות וגזלו ובתים ונשאו ועשקו גבר וביתו ואיש ונחלתו {פ}

³ג לכן כה אמר יהוה הנני חשב על המשפחה הזאת רעה אשר לא תמישו משם צוארתיכם ולא תלכו רומה--כי עת רעה היא

⁴ד ביום ההוא ישא עליכם משל ונהה נהי נהיה אמר שדוד נשדנו--חלק עמי ימיר איך ימיש לי לשובב שדינו יחלק

⁵ה לכן לא יהיה לך משליך חבל בגורל בקהל יהוה

⁶ו אל תטפו יטיפון לא יטפו לאלה לא יסג כלמות

⁷ז האמור בית יעקב הקצר רוח יהוה--אם אלה מעלליו הלוא דברי ייטיבו עם הישר הלך

⁸ח ואתמול עמי לאויב יקומם ממול שלמה אדר תפשטון מעברים בטח שובי מלחמה

⁹ט נשי עמי תגרשון מבית תענגיה מעל עלליה תקחו הדרי לעולם

¹⁰י קומו ולכו כי לא זאת המנוחה בעבור טמאה תחבל וחבל נמרץ

¹¹יא לו איש הלך רוח ושקר כזב אטף לך ליין ולשכר והיה מטיף העם הזה

¹²יב אסף אאסף יעקב כלך קבץ אקבץ שארית ישראל--יחד אשימנו כצאן בצרה כעדר בתוך הדברו תהימנה מאדם

¹³יג עלה הפרץ לפניהם--פרצו ויעברו שער ויצאו בו ויעבר מלכם לפניהם ויהוה בראשם {פ}