Read כֶּתֶר אֲרָם צוֹבָא - Tanah Aleppo Codex מיכה 5 Bible Online

מיכה 5 - כֶּתֶר אֲרָם צוֹבָא - Tanah Aleppo Codex bible

מיכה 5

¹א ואתה בית לחם אפרתה צעיר להיות באלפי יהודה--ממך לי יצא להיות מושל בישראל ומוצאתיו מקדם מימי עולם

²ב לכן יתנם עד עת יולדה ילדה ויתר אחיו ישובון על בני ישראל

³ג ועמד ורעה בעז יהוה--בגאון שם יהוה אלהיו וישבו כי עתה יגדל עד אפסי ארץ

⁴ד והיה זה שלום אשור כי יבוא בארצנו וכי ידרך בארמנותינו והקמנו עליו שבעה רעים ושמנה נסיכי אדם

⁵ה ורעו את ארץ אשור בחרב ואת ארץ נמרד בפתחיה והציל מאשור--כי יבוא בארצנו וכי ידרך בגבולנו {פ}

⁶ו והיה שארית יעקב בקרב עמים רבים כטל מאת יהוה כרביבים עלי עשב--אשר לא יקוה לאיש ולא ייחל לבני אדם {פ}

⁷ז והיה שארית יעקב בגוים בקרב עמים רבים כאריה בבהמות יער ככפיר בעדרי צאן--אשר אם עבר ורמס וטרף ואין מציל

⁸ח תרם ידך על צריך וכל איביך יכרתו

⁹ט והיה ביום ההוא נאם יהוה והכרתי סוסיך מקרבך והאבדתי מרכבתיך

¹⁰י והכרתי ערי ארצך והרסתי כל מבצריך

¹¹יא והכרתי כשפים מידך ומעוננים לא יהיו לך

¹²יב והכרתי פסיליך ומצבותיך מקרבך ולא תשתחוה עוד למעשה ידיך

¹³יג ונתשתי אשיריך מקרבך והשמדתי עריך

¹⁴יד ועשיתי באף ובחמה נקם--את הגוים אשר לא שמעו {פ}