Read כֶּתֶר אֲרָם צוֹבָא - Tanah Aleppo Codex מיכה 6 Bible Online

מיכה 6 - כֶּתֶר אֲרָם צוֹבָא - Tanah Aleppo Codex bible

מיכה 6

¹א שמעו נא את אשר יהוה אמר קום ריב את ההרים ותשמענה הגבעות קולך

²ב שמעו הרים את ריב יהוה והאתנים מוסדי ארץ כי ריב ליהוה עם עמו ועם ישראל יתוכח

³ג עמי מה עשיתי לך ומה הלאתיך ענה בי

⁴ד כי העלתיך מארץ מצרים ומבית עבדים פדיתיך ואשלח לפניך את משה אהרן ומרים

⁵ה עמי זכר נא מה יעץ בלק מלך מואב ומה ענה אתו בלעם בן בעור--מן השטים עד הגלגל למען דעת צדקות יהוה

⁶ו במה אקדם יהוה אכף לאלהי מרום האקדמנו בעולות בעגלים בני שנה

⁷ז הירצה יהוה באלפי אילים ברבבות נחלי שמן האתן בכורי פשעי פרי בטני חטאת נפשי

⁸ח הגיד לך אדם מה טוב ומה יהוה דורש ממך כי אם עשות משפט ואהבת חסד והצנע לכת עם אלהיך {ס}

⁹ט קול יהוה לעיר יקרא ותושיה יראה שמך שמעו מטה ומי יעדה

¹⁰י עוד האש בית רשע--אצרות רשע ואיפת רזון זעומה

¹¹יא האזכה במאזני רשע ובכיס אבני מרמה

¹²יב אשר עשיריה מלאו חמס וישביה דברו שקר ולשונם רמיה בפיהם

¹³יג וגם אני החליתי הכותך--השמם על חטאתך

¹⁴יד אתה תאכל ולא תשבע וישחך בקרבך ותסג ולא תפליט ואשר תפלט לחרב אתן

¹⁵טו אתה תזרע ולא תקצור אתה תדרך זית ולא תסוך שמן ותירוש ולא תשתה יין

¹⁶טז וישתמר חקות עמרי וכל מעשה בית אחאב ותלכו במעצותם--למען תתי אתך לשמה וישביה לשרקה וחרפת עמי תשאו {פ}