Read כֶּתֶר אֲרָם צוֹבָא - Tanah Aleppo Codex נחום 1 Bible Online

נחום 1 - כֶּתֶר אֲרָם צוֹבָא - Tanah Aleppo Codex bible

נחום 1

¹א משא נינוה--ספר חזון נחום האלקשי

²ב אל קנוא ונקם יהוה נקם יהוה ובעל חמה נקם יהוה לצריו ונוטר הוא לאיביו

³ג יהוה ארך אפים וגדול (וגדל) כח ונקה לא ינקה יהוה בסופה ובשערה דרכו וענן אבק רגליו

⁴ד גוער בים ויבשהו וכל הנהרות החריב אמלל בשן וכרמל ופרח לבנון אמלל

⁵ה הרים רעשו ממנו והגבעות התמגגו ותשא הארץ מפניו ותבל וכל יושבי בה

⁶ו לפני זעמו מי יעמוד ומי יקום בחרון אפו חמתו נתכה כאש והצרים נתצו ממנו

⁷ז טוב יהוה למעוז ביום צרה וידע חסי בו

⁸ח ובשטף עבר כלה יעשה מקומה ואיביו ירדף חשך

⁹ט מה תחשבון אל יהוה--כלה הוא עשה לא תקום פעמים צרה

¹⁰י כי עד סירים סבכים וכסבאם סבואים אכלו--כקש יבש מלא

¹¹יא ממך יצא חשב על יהוה רעה--יעץ בליעל {ס}

¹²יב כה אמר יהוה אם שלמים וכן רבים וכן נגוזו ועבר וענתך--לא אענך עוד

¹³יג ועתה אשבר מטהו מעליך ומוסרתיך אנתק

¹⁴יד וצוה עליך יהוה לא יזרע משמך עוד מבית אלהיך אכרית פסל ומסכה אשים קברך--כי קלות {פ}