Read כֶּתֶר אֲרָם צוֹבָא - Tanah Aleppo Codex חבקוק 1 Bible Online

חבקוק 1 - כֶּתֶר אֲרָם צוֹבָא - Tanah Aleppo Codex bible

חבקוק 1

¹א המשא אשר חזה חבקוק הנביא

²ב עד אנה יהוה שועתי ולא תשמע אזעק אליך חמס ולא תושיע

³ג למה תראני און ועמל תביט ושד וחמס לנגדי ויהי ריב ומדון ישא

⁴ד על כן תפוג תורה ולא יצא לנצח משפט כי רשע מכתיר את הצדיק על כן יצא משפט מעקל

⁵ה ראו בגוים והביטו והתמהו תמהו כי פעל פעל בימיכם לא תאמינו כי יספר

⁶ו כי הנני מקים את הכשדים הגוי המר והנמהר ההולך למרחבי ארץ לרשת משכנות לא לו

⁷ז אים ונורא הוא ממנו משפטו ושאתו יצא

⁸ח וקלו מנמרים סוסיו וחדו מזאבי ערב ופשו פרשיו ופרשיו מרחוק יבאו--יעפו כנשר חש לאכול

⁹ט כלה לחמס יבוא מגמת פניהם קדימה ויאסף כחול שבי

¹⁰י והוא במלכים יתקלס ורזנים משחק לו הוא לכל מבצר ישחק ויצבר עפר וילכדה

¹¹יא אז חלף רוח ויעבר ואשם זו כחו לאלהו

¹²יב הלוא אתה מקדם יהוה אלהי קדשי--לא נמות יהוה למשפט שמתו וצור להוכיח יסדתו

¹³יג טהור עינים מראות רע והביט אל עמל לא תוכל למה תביט בוגדים--תחריש בבלע רשע צדיק ממנו

¹⁴יד ותעשה אדם כדגי הים--כרמש לא משל בו

¹⁵טו כלה בחכה העלה--יגרהו בחרמו ויאספהו במכמרתו על כן ישמח ויגיל

¹⁶טז על כן יזבח לחרמו ויקטר למכמרתו כי בהמה שמן חלקו ומאכלו בראה

¹⁷יז העל כן יריק חרמו ותמיד להרג גוים לא יחמול {ס}