Read כֶּתֶר אֲרָם צוֹבָא - Tanah Aleppo Codex חבקוק 2 Bible Online

חבקוק 2 - כֶּתֶר אֲרָם צוֹבָא - Tanah Aleppo Codex bible

חבקוק 2

¹א על משמרתי אעמדה ואתיצבה על מצור ואצפה לראות מה ידבר בי ומה אשיב על תוכחתי

²ב ויענני יהוה ויאמר כתב חזון ובאר על הלחות--למען ירוץ קורא בו

³ג כי עוד חזון למועד ויפח לקץ ולא יכזב אם יתמהמה חכה לו--כי בא יבא לא יאחר

⁴ד הנה עפלה לא ישרה נפשו בו וצדיק באמונתו יחיה {ס}

⁵ה ואף כי היין בגד גבר יהיר ולא ינוה אשר הרחיב כשאול נפשו והוא כמות ולא ישבע ויאסף אליו כל הגוים ויקבץ אליו כל העמים

⁶ו הלוא אלה כלם עליו משל ישאו ומליצה חידות לו ויאמר הוי המרבה לא לו--עד מתי ומכביד עליו עבטיט

⁷ז הלוא פתע יקומו נשכיך ויקצו מזעזעיך והיית למשסות למו

⁸ח כי אתה שלות גוים רבים ישלוך כל יתר עמים מדמי אדם וחמס ארץ קריה וכל ישבי בה {פ}

⁹ט הוי בצע בצע רע--לביתו לשום במרום קנו להנצל מכף רע

¹⁰י יעצת בשת לביתך קצות עמים רבים וחוטא נפשך

¹¹יא כי אבן מקיר תזעק וכפיס מעץ יעננה {פ}

¹²יב הוי בנה עיר בדמים וכונן קריה בעולה

¹³יג הלוא הנה מאת יהוה צבאות וייגעו עמים בדי אש ולאמים בדי ריק יעפו

¹⁴יד כי תמלא הארץ לדעת את כבוד יהוה כמים יכסו על ים {פ}

¹⁵טו הוי משקה רעהו מספח חמתך ואף שכר--למען הביט על מעוריהם

¹⁶טז שבעת קלון מכבוד שתה גם אתה והערל תסוב עליך כוס ימין יהוה וקיקלון על כבודך

¹⁷יז כי חמס לבנון יכסך ושד בהמות יחיתן מדמי אדם וחמס ארץ קריה וכל ישבי בה

¹⁸יח מה הועיל פסל כי פסלו יצרו--מסכה ומורה שקר כי בטח יצר יצרו עליו לעשות אלילים אלמים {ס}

¹⁹יט הוי אמר לעץ הקיצה עורי לאבן דומם הוא יורה--הנה הוא תפוש זהב וכסף וכל רוח אין בקרבו

²⁰כ ויהוה בהיכל קדשו הס מפניו כל הארץ {ס}