Read כֶּתֶר אֲרָם צוֹבָא - Tanah Aleppo Codex חבקוק 3 Bible Online

חבקוק 3 - כֶּתֶר אֲרָם צוֹבָא - Tanah Aleppo Codex bible

חבקוק 3

¹א תפלה לחבקוק הנביא--על שגינות

²ב יהוה שמעתי שמעך יראתי--יהוה פעלך בקרב שנים חייהו בקרב שנים תודיע ברגז רחם תזכור

³ג אלוה מתימן יבוא וקדוש מהר פארן סלה כסה שמים הודו ותהלתו מלאה הארץ

⁴ד ונגה כאור תהיה קרנים מידו לו ושם חביון עזה

⁵ה לפניו ילך דבר ויצא רשף לרגליו

⁶ו עמד וימדד ארץ ראה ויתר גוים ויתפצצו הררי עד שחו גבעות עולם הליכות עולם לו

⁷ז תחת און ראיתי אהלי כושן ירגזון יריעות ארץ מדין

⁸ח הבנהרים חרה יהוה--אם בנהרים אפך אם בים עברתך כי תרכב על סוסיך מרכבתיך ישועה

⁹ט עריה תעור קשתך שבעות מטות אמר סלה נהרות תבקע ארץ

¹⁰י ראוך יחילו הרים זרם מים עבר נתן תהום קולו רום ידיהו נשא

¹¹יא שמש ירח עמד זבלה לאור חציך יהלכו לנגה ברק חניתך

¹²יב בזעם תצעד ארץ באף תדוש גוים

¹³יג יצאת לישע עמך לישע את משיחך מחצת ראש מבית רשע ערות יסוד עד צואר סלה {פ}

¹⁴יד נקבת במטיו ראש פרזו יסערו להפיצני עליצתם כמו לאכל עני במסתר

¹⁵טו דרכת בים סוסיך חמר מים רבים

¹⁶טז שמעתי ותרגז בטני לקול צללו שפתי--יבוא רקב בעצמי ותחתי ארגז אשר אנוח ליום צרה לעלות לעם יגודנו

¹⁷יז כי תאנה לא תפרח ואין יבול בגפנים--כחש מעשה זית ושדמות לא עשה אכל גזר ממכלה צאן ואין בקר ברפתים

¹⁸יח ואני ביהוה אעלוזה אגילה באלהי ישעי

¹⁹יט יהוה אדני חילי וישם רגלי כאילות ועל במותי ידרכני למנצח בנגינותי {ש}