Read כֶּתֶר אֲרָם צוֹבָא - Tanah Aleppo Codex צפניה 2 Bible Online

צפניה 2 - כֶּתֶר אֲרָם צוֹבָא - Tanah Aleppo Codex bible

צפניה 2

¹א התקוששו וקושו--הגוי לא נכסף

²ב בטרם לדת חק כמץ עבר יום בטרם לא יבוא עליכם חרון אף יהוה--בטרם לא יבוא עליכם יום אף יהוה

³ג בקשו את יהוה כל ענוי הארץ אשר משפטו פעלו בקשו צדק בקשו ענוה--אולי תסתרו ביום אף יהוה

⁴ד כי עזה עזובה תהיה ואשקלון לשממה אשדוד בצהרים יגרשוה ועקרון תעקר {ס}

⁵ה הוי ישבי חבל הים--גוי כרתים דבר יהוה עליכם כנען ארץ פלשתים והאבדתיך מאין יושב

⁶ו והיתה חבל הים נות כרת רעים--וגדרות צאן

⁷ז והיה חבל לשארית בית יהודה--עליהם ירעון בבתי אשקלון בערב ירבצון--כי יפקדם יהוה אלהיהם ושב שבותם (שביתם)

⁸ח שמעתי חרפת מואב וגדפי בני עמון--אשר חרפו את עמי ויגדילו על גבולם

⁹ט לכן חי אני נאם יהוה צבאות אלהי ישראל כי מואב כסדם תהיה ובני עמון כעמרה ממשק חרול ומכרה מלח ושממה עד עולם שארית עמי יבזום ויתר גוי ינחלום

¹⁰י זאת להם תחת גאונם כי חרפו ויגדלו על עם יהוה צבאות

¹¹יא נורא יהוה עליהם כי רזה את כל אלהי הארץ וישתחוו לו איש ממקומו כל איי הגוים

¹²יב גם אתם כושים חללי חרבי המה

¹³יג ויט ידו על צפון ויאבד את אשור וישם את נינוה לשממה ציה כמדבר

¹⁴יד ורבצו בתוכה עדרים כל חיתו גוי--גם קאת גם קפד בכפתריה ילינו קול ישורר בחלון חרב בסף כי ארזה ערה

¹⁵טו זאת העיר העליזה היושבת לבטח האמרה בלבבה אני ואפסי עוד איך היתה לשמה מרבץ לחיה--כל עובר עליה ישרק יניע ידו {פ}