Read כֶּתֶר אֲרָם צוֹבָא - Tanah Aleppo Codex צפניה 3 Bible Online

צפניה 3 - כֶּתֶר אֲרָם צוֹבָא - Tanah Aleppo Codex bible

צפניה 3

¹א הוי מראה ונגאלה--העיר היונה

²ב לא שמעה בקול לא לקחה מוסר ביהוה לא בטחה אל אלהיה לא קרבה

³ג שריה בקרבה אריות שאגים שפטיה זאבי ערב לא גרמו לבקר

⁴ד נביאיה פחזים אנשי בגדות כהניה חללו קדש חמסו תורה

⁵ה יהוה צדיק בקרבה לא יעשה עולה בבקר בבקר משפטו יתן לאור לא נעדר ולא יודע עול בשת

⁶ו הכרתי גוים נשמו פנותם--החרבתי חוצותם מבלי עובר נצדו עריהם מבלי איש מאין יושב

⁷ז אמרתי אך תיראי אותי תקחי מוסר ולא יכרת מעונה כל אשר פקדתי עליה אכן השכימו השחיתו כל עלילותם

⁸ח לכן חכו לי נאם יהוה ליום קומי לעד כי משפטי לאסף גוים לקבצי ממלכות לשפך עליהם זעמי כל חרון אפי--כי באש קנאתי תאכל כל הארץ

⁹ט כי אז אהפך אל עמים שפה ברורה לקרא כלם בשם יהוה לעבדו שכם אחד

¹⁰י מעבר לנהרי כוש--עתרי בת פוצי יובלון מנחתי

¹¹יא ביום ההוא לא תבושי מכל עלילתיך אשר פשעת בי כי אז אסיר מקרבך עליזי גאותך ולא תוספי לגבהה עוד בהר קדשי

¹²יב והשארתי בקרבך עם עני ודל וחסו בשם יהוה

¹³יג שארית ישראל לא יעשו עולה ולא ידברו כזב ולא ימצא בפיהם לשון תרמית כי המה ירעו ורבצו ואין מחריד {פ}

¹⁴יד רני בת ציון--הריעו ישראל שמחי ועלזי בכל לב בת ירושלם

¹⁵טו הסיר יהוה משפטיך פנה איבך מלך ישראל יהוה בקרבך לא תיראי רע עוד {פ}

¹⁶טז ביום ההוא יאמר לירושלם אל תיראי ציון אל ירפו ידיך

¹⁷יז יהוה אלהיך בקרבך גבור יושיע ישיש עליך בשמחה יחריש באהבתו--יגיל עליך ברנה

¹⁸יח נוגי ממועד אספתי ממך היו--משאת עליה חרפה

¹⁹יט הנני עשה את כל מעניך בעת ההיא והושעתי את הצלעה והנדחה אקבץ ושמתים לתהלה ולשם בכל הארץ בשתם

²⁰כ בעת ההיא אביא אתכם ובעת קבצי אתכם כי אתן אתכם לשם ולתהלה בכל עמי הארץ בשובי את שבותיכם לעיניכם אמר יהוה {ש}