Read כֶּתֶר אֲרָם צוֹבָא - Tanah Aleppo Codex חגי 1 Bible Online

חגי 1 - כֶּתֶר אֲרָם צוֹבָא - Tanah Aleppo Codex bible

חגי 1

¹א בשנת שתים לדריוש המלך בחדש הששי ביום אחד לחדש--היה דבר יהוה ביד חגי הנביא אל זרבבל בן שאלתיאל פחת יהודה ואל יהושע בן יהוצדק הכהן הגדול לאמר

²ב כה אמר יהוה צבאות לאמר העם הזה אמרו לא עת בא עת בית יהוה להבנות {פ}

³ג ויהי דבר יהוה ביד חגי הנביא לאמר

⁴ד העת לכם אתם לשבת בבתיכם ספונים--והבית הזה חרב

⁵ה ועתה כה אמר יהוה צבאות שימו לבבכם על דרכיכם

⁶ו זרעתם הרבה והבא מעט אכול ואין לשבעה שתו ואין לשכרה לבוש ואין לחם לו והמשתכר--משתכר אל צרור נקוב {פ}

⁷ז כה אמר יהוה צבאות שימו לבבכם על דרכיכם

⁸ח עלו ההר והבאתם עץ ובנו הבית וארצה בו ואכבד (ואכבדה) אמר יהוה

⁹ט פנה אל הרבה והנה למעט והבאתם הבית ונפחתי בו יען מה נאם יהוה צבאות--יען ביתי אשר הוא חרב ואתם רצים איש לביתו

¹⁰י על כן עליכם כלאו שמים מטל והארץ כלאה יבולה

¹¹יא ואקרא חרב על הארץ ועל ההרים ועל הדגן ועל התירוש ועל היצהר ועל אשר תוציא האדמה ועל האדם ועל הבהמה ועל כל יגיע כפים {ס}

¹²יב וישמע זרבבל בן שלתיאל ויהושע בן יהוצדק הכהן הגדול וכל שארית העם בקול יהוה אלהיהם ועל דברי חגי הנביא כאשר שלחו יהוה אלהיהם וייראו העם מפני יהוה

¹³יג ויאמר חגי מלאך יהוה במלאכות יהוה--לעם לאמר אני אתכם נאם יהוה

¹⁴יד ויער יהוה את רוח זרבבל בן שלתיאל פחת יהודה ואת רוח יהושע בן יהוצדק הכהן הגדול ואת רוח כל שארית העם ויבאו ויעשו מלאכה בבית יהוה צבאות אלהיהם {פ}

¹⁵טו ביום עשרים וארבעה לחדש בששי בשנת שתים לדריוש המלך