Read כֶּתֶר אֲרָם צוֹבָא - Tanah Aleppo Codex זכריה 10 Bible Online

זכריה 10 - כֶּתֶר אֲרָם צוֹבָא - Tanah Aleppo Codex bible

זכריה 10

¹א שאלו מיהוה מטר בעת מלקוש יהוה עשה חזיזים ומטר גשם יתן להם לאיש עשב בשדה

²ב כי התרפים דברו און והקוסמים חזו שקר וחלמות השוא ידברו הבל ינחמון על כן נסעו כמו צאן יענו כי אין רעה {פ}

³ג על הרעים חרה אפי ועל העתודים אפקוד כי פקד יהוה צבאות את עדרו את בית יהודה ושם אותם כסוס הודו במלחמה

⁴ד ממנו פנה ממנו יתד ממנו קשת מלחמה ממנו יצא כל נוגש יחדו

⁵ה והיו כגברים בוסים בטיט חוצות במלחמה ונלחמו כי יהוה עמם והבישו רכבי סוסים

⁶ו וגברתי את בית יהודה ואת בית יוסף אושיע והושבותים כי רחמתים והיו כאשר לא זנחתים כי אני יהוה אלהיהם--ואענם

⁷ז והיו כגבור אפרים ושמח לבם כמו יין ובניהם יראו ושמחו יגל לבם ביהוה

⁸ח אשרקה להם ואקבצם כי פדיתים ורבו כמו רבו

⁹ט ואזרעם בעמים ובמרחקים יזכרוני וחיו את בניהם ושבו

¹⁰י והשבותים מארץ מצרים ומאשור אקבצם ואל ארץ גלעד ולבנון אביאם ולא ימצא להם

¹¹יא ועבר בים צרה והכה בים גלים והבישו כל מצולות יאר והורד גאון אשור ושבט מצרים יסור

¹²יב וגברתים ביהוה ובשמו יתהלכו נאם יהוה {פ}