Read כֶּתֶר אֲרָם צוֹבָא - Tanah Aleppo Codex זכריה 12 Bible Online

זכריה 12 - כֶּתֶר אֲרָם צוֹבָא - Tanah Aleppo Codex bible

זכריה 12

¹א משא דבר יהוה על ישראל נאם יהוה נטה שמים ויסד ארץ ויצר רוח אדם בקרבו

²ב הנה אנכי שם את ירושלם סף רעל לכל העמים--סביב וגם על יהודה יהיה במצור על ירושלם

³ג והיה ביום ההוא אשים את ירושלם אבן מעמסה לכל העמים--כל עמסיה שרוט ישרטו ונאספו עליה כל גויי הארץ

⁴ד ביום ההוא נאם יהוה אכה כל סוס בתמהון ורכבו בשגעון ועל בית יהודה אפקח את עיני וכל סוס העמים אכה בעורון

⁵ה ואמרו אלפי יהודה בלבם אמצה לי ישבי ירושלם ביהוה צבאות אלהיהם

⁶ו ביום ההוא אשים את אלפי יהודה ככיור אש בעצים וכלפיד אש בעמיר ואכלו על ימין ועל שמאול את כל העמים סביב וישבה ירושלם עוד תחתיה בירושלם

⁷ז והושע יהוה את אהלי יהודה בראשנה למען לא תגדל תפארת בית דויד ותפארת ישב ירושלם--על יהודה

⁸ח ביום ההוא יגן יהוה בעד יושב ירושלם והיה הנכשל בהם ביום ההוא כדויד ובית דויד כאלהים כמלאך יהוה לפניהם

⁹ט והיה ביום ההוא אבקש להשמיד את כל הגוים הבאים על ירושלם

¹⁰י ושפכתי על בית דויד ועל יושב ירושלם רוח חן ותחנונים והביטו אלי את אשר דקרו וספדו עליו כמספד על היחיד והמר עליו כהמר על הבכור

¹¹יא ביום ההוא יגדל המספד בירושלם כמספד הדדרמון בבקעת מגדון

¹²יב וספדה הארץ משפחות משפחות לבד משפחת בית דויד לבד ונשיהם לבד--משפחת בית נתן לבד ונשיהם לבד

¹³יג משפחת בית לוי לבד ונשיהם לבד משפחת השמעי לבד ונשיהם לבד

¹⁴יד כל המשפחות הנשארות--משפחת משפחת לבד ונשיהם לבד