Read כֶּתֶר אֲרָם צוֹבָא - Tanah Aleppo Codex זכריה 4 Bible Online

זכריה 4 - כֶּתֶר אֲרָם צוֹבָא - Tanah Aleppo Codex bible

זכריה 4

¹א וישב המלאך הדבר בי ויעירני כאיש אשר יעור משנתו

²ב ויאמר אלי מה אתה ראה ויאמר (ואמר) ראיתי והנה מנורת זהב כלה וגלה על ראשה ושבעה נרתיה עליה--שבעה ושבעה מוצקות לנרות אשר על ראשה

³ג ושנים זיתים עליה אחד מימין הגלה ואחד על שמאלה

⁴ד ואען ואמר אל המלאך הדבר בי לאמר מה אלה אדני

⁵ה ויען המלאך הדבר בי ויאמר אלי הלוא ידעת מה המה אלה ואמר לא אדני

⁶ו ויען ויאמר אלי לאמר זה דבר יהוה אל זרבבל לאמר לא בחיל ולא בכח--כי אם ברוחי אמר יהוה צבאות

⁷ז מי אתה הר הגדול לפני זרבבל למישר והוציא את האבן הראשה--תשאות חן חן לה {פ}

⁸ח ויהי דבר יהוה אלי לאמר

⁹ט ידי זרבבל יסדו הבית הזה--וידיו תבצענה וידעת כי יהוה צבאות שלחני אליכם

¹⁰י כי מי בז ליום קטנות ושמחו וראו את האבן הבדיל ביד זרבבל שבעה אלה עיני יהוה המה משוטטים בכל הארץ

¹¹יא ואען ואמר אליו מה שני הזיתים האלה על ימין המנורה ועל שמאולה

¹²יב ואען שנית ואמר אליו מה שתי שבלי הזיתים אשר ביד שני צנתרות הזהב המריקים מעליהם הזהב

¹³יג ויאמר אלי לאמר הלוא ידעת מה אלה ואמר לא אדני

¹⁴יד ויאמר אלה שני בני היצהר העמדים על אדון כל הארץ