Read כֶּתֶר אֲרָם צוֹבָא - Tanah Aleppo Codex זכריה 7 Bible Online

זכריה 7 - כֶּתֶר אֲרָם צוֹבָא - Tanah Aleppo Codex bible

זכריה 7

¹א ויהי בשנת ארבע לדריוש המלך היה דבר יהוה אל זכריה בארבעה לחדש התשעי--בכסלו

²ב וישלח בית אל שראצר ורגם מלך ואנשיו--לחלות את פני יהוה

³ג לאמר אל הכהנים אשר לבית יהוה צבאות ואל הנביאים לאמר האבכה בחדש החמשי--הנזר כאשר עשיתי זה כמה שנים {פ}

⁴ד ויהי דבר יהוה צבאות אלי לאמר

⁵ה אמר אל כל עם הארץ ואל הכהנים לאמר כי צמתם וספוד בחמישי ובשביעי וזה שבעים שנה--הצום צמתני אני

⁶ו וכי תאכלו וכי תשתו--הלוא אתם האכלים ואתם השתים

⁷ז הלוא את הדברים אשר קרא יהוה ביד הנביאים הראשנים בהיות ירושלם ישבת ושלוה ועריה סביבתיה והנגב והשפלה ישב {פ}

⁸ח ויהי דבר יהוה אל זכריה לאמר

⁹ט כה אמר יהוה צבאות לאמר משפט אמת שפטו וחסד ורחמים עשו איש את אחיו

¹⁰י ואלמנה ויתום גר ועני אל תעשקו ורעת איש אחיו אל תחשבו בלבבכם

¹¹יא וימאנו להקשיב ויתנו כתף סררת ואזניהם הכבידו משמוע

¹²יב ולבם שמו שמיר משמוע את התורה ואת הדברים אשר שלח יהוה צבאות ברוחו ביד הנביאים הראשנים ויהי קצף גדול מאת יהוה צבאות

¹³יג ויהי כאשר קרא ולא שמעו כן יקראו ולא אשמע אמר יהוה צבאות

¹⁴יד ואסערם על כל הגוים אשר לא ידעום והארץ נשמה אחריהם מעבר ומשב וישימו ארץ חמדה לשמה {פ}