Read כֶּתֶר אֲרָם צוֹבָא - Tanah Aleppo Codex זכריה 9 Bible Online

זכריה 9 - כֶּתֶר אֲרָם צוֹבָא - Tanah Aleppo Codex bible

זכריה 9

¹א משא דבר יהוה בארץ חדרך ודמשק מנחתו כי ליהוה עין אדם וכל שבטי ישראל

²ב וגם חמת תגבל בה צר וצידון כי חכמה מאד

³ג ותבן צר מצור לה ותצבר כסף כעפר וחרוץ כטיט חוצות

⁴ד הנה אדני יורשנה והכה בים חילה והיא באש תאכל

⁵ה תרא אשקלון ותירא ועזה ותחיל מאד ועקרון כי הביש מבטה ואבד מלך מעזה ואשקלון לא תשב

⁶ו וישב ממזר באשדוד והכרתי גאון פלשתים

⁷ז והסרתי דמיו מפיו ושקציו מבין שניו ונשאר גם הוא לאלהינו והיה כאלף ביהודה ועקרון כיבוסי

⁸ח וחניתי לביתי מצבה מעבר ומשב ולא יעבר עליהם עוד נגש כי עתה ראיתי בעיני {ס}

⁹ט גילי מאד בת ציון הריעי בת ירושלם הנה מלכך יבוא לך צדיק ונושע הוא עני ורכב על חמור ועל עיר בן אתנות

¹⁰י והכרתי רכב מאפרים וסוס מירושלם ונכרתה קשת מלחמה ודבר שלום לגוים ומשלו מים עד ים ומנהר עד אפסי ארץ

¹¹יא גם את בדם בריתך שלחתי אסיריך מבור אין מים בו

¹²יב שובו לבצרון אסירי התקוה גם היום מגיד משנה אשיב לך

¹³יג כי דרכתי לי יהודה קשת מלאתי אפרים ועוררתי בניך ציון על בניך יון ושמתיך כחרב גבור

¹⁴יד ויהוה עליהם יראה ויצא כברק חצו ואדני יהוה בשופר יתקע והלך בסערות תימן

¹⁵טו יהוה צבאות יגן עליהם ואכלו וכבשו אבני קלע ושתו המו כמו יין ומלאו כמזרק--כזויות מזבח

¹⁶טז והושיעם יהוה אלהיהם ביום ההוא--כצאן עמו כי אבני נזר מתנוססות על אדמתו

¹⁷יז כי מה טובו ומה יפיו--דגן בחורים ותירוש ינובב בתלות