Read כֶּתֶר אֲרָם צוֹבָא - Tanah Aleppo Codex דברים 1 Bible Online

דברים 1 - כֶּתֶר אֲרָם צוֹבָא - Tanah Aleppo Codex bible

דברים 1

¹א אלה הדברים אשר דבר משה אל כל ישראל בעבר הירדן במדבר בערבה מול סוף בין פארן ובין תפל ולבן וחצרת--ודי זהב

²ב אחד עשר יום מחרב דרך הר שעיר עד קדש ברנע

³ג ויהי בארבעים שנה בעשתי עשר חדש באחד לחדש דבר משה אל בני ישראל ככל אשר צוה יהוה אתו אלהם

⁴ד אחרי הכתו את סיחן מלך האמרי אשר יושב בחשבון--ואת עוג מלך הבשן אשר יושב בעשתרת באדרעי

⁵ה בעבר הירדן בארץ מואב הואיל משה באר את התורה הזאת לאמר

⁶ו יהוה אלהינו דבר אלינו בחרב לאמר רב לכם שבת בהר הזה

⁷ז פנו וסעו לכם ובאו הר האמרי ואל כל שכניו בערבה בהר ובשפלה ובנגב ובחוף הים--ארץ הכנעני והלבנון עד הנהר הגדל נהר פרת

⁸ח ראה נתתי לפניכם את הארץ באו ורשו את הארץ אשר נשבע יהוה לאבתיכם לאברהם ליצחק וליעקב לתת להם ולזרעם אחריהם

⁹ט ואמר אלכם בעת ההוא לאמר לא אוכל לבדי שאת אתכם

¹⁰י יהוה אלהיכם הרבה אתכם והנכם היום ככוכבי השמים לרב

¹¹יא יהוה אלהי אבותכם יסף עליכם ככם--אלף פעמים ויברך אתכם כאשר דבר לכם

¹²יב איכה אשא לבדי טרחכם ומשאכם וריבכם

¹³יג הבו לכם אנשים חכמים ונבנים וידעים--לשבטיכם ואשימם בראשיכם

¹⁴יד ותענו אתי ותאמרו טוב הדבר אשר דברת לעשות

¹⁵טו ואקח את ראשי שבטיכם אנשים חכמים וידעים ואתן אותם ראשים עליכם שרי אלפים ושרי מאות ושרי חמשים ושרי עשרת ושטרים לשבטיכם

¹⁶טז ואצוה את שפטיכם בעת ההוא לאמר שמע בין אחיכם ושפטתם צדק בין איש ובין אחיו ובין גרו

¹⁷יז לא תכירו פנים במשפט כקטן כגדל תשמעון--לא תגורו מפני איש כי המשפט לאלהים הוא והדבר אשר יקשה מכם תקרבון אלי ושמעתיו

¹⁸יח ואצוה אתכם בעת ההוא את כל הדברים אשר תעשון

¹⁹יט ונסע מחרב ונלך את כל המדבר הגדול והנורא ההוא אשר ראיתם דרך הר האמרי כאשר צוה יהוה אלהינו אתנו ונבא עד קדש ברנע

²⁰כ ואמר אלכם באתם עד הר האמרי אשר יהוה אלהינו נתן לנו

²¹כא ראה נתן יהוה אלהיך לפניך--את הארץ עלה רש כאשר דבר יהוה אלהי אבתיך לך--אל תירא ואל תחת

²²כב ותקרבון אלי כלכם ותאמרו נשלחה אנשים לפנינו ויחפרו לנו את הארץ וישבו אתנו דבר--את הדרך אשר נעלה בה ואת הערים אשר נבא אליהן

²³כג וייטב בעיני הדבר ואקח מכם שנים עשר אנשים איש אחד לשבט

²⁴כד ויפנו ויעלו ההרה ויבאו עד נחל אשכל וירגלו אתה

²⁵כה ויקחו בידם מפרי הארץ ויורדו אלינו וישבו אתנו דבר ויאמרו טובה הארץ אשר יהוה אלהינו נתן לנו

²⁶כו ולא אביתם לעלת ותמרו את פי יהוה אלהיכם

²⁷כז ותרגנו באהליכם ותאמרו בשנאת יהוה אתנו הוציאנו מארץ מצרים--לתת אתנו ביד האמרי להשמידנו

²⁸כח אנה אנחנו עלים אחינו המסו את לבבנו לאמר עם גדול ורם ממנו ערים גדלת ובצורת בשמים וגם בני ענקים ראינו שם

²⁹כט ואמר אלכם לא תערצון ולא תיראון מהם

³⁰ל יהוה אלהיכם ההלך לפניכם הוא ילחם לכם ככל אשר עשה אתכם במצרים--לעיניכם

³¹לא ובמדבר אשר ראית אשר נשאך יהוה אלהיך כאשר ישא איש את בנו--בכל הדרך אשר הלכתם עד באכם עד המקום הזה

³²לב ובדבר הזה--אינכם מאמינם ביהוה אלהיכם

³³לג ההלך לפניכם בדרך לתור לכם מקום--לחנתכם באש לילה לראתכם בדרך אשר תלכו בה ובענן יומם

³⁴לד וישמע יהוה את קול דבריכם ויקצף וישבע לאמר

³⁵לה אם יראה איש באנשים האלה הדור הרע הזה--את הארץ הטובה אשר נשבעתי לתת לאבתיכם

³⁶לו זולתי כלב בן יפנה הוא יראנה ולו אתן את הארץ אשר דרך בה ולבניו--יען אשר מלא אחרי יהוה

³⁷לז גם בי התאנף יהוה בגללכם לאמר גם אתה לא תבא שם

³⁸לח יהושע בן נון העמד לפניך הוא יבא שמה אתו חזק כי הוא ינחלנה את ישראל

³⁹לט וטפכם אשר אמרתם לבז יהיה ובניכם אשר לא ידעו היום טוב ורע--המה יבאו שמה ולהם אתננה והם יירשוה

⁴⁰מ ואתם פנו לכם וסעו המדברה דרך ים סוף

⁴¹מא ותענו ותאמרו אלי חטאנו ליהוה--אנחנו נעלה ונלחמנו ככל אשר צונו יהוה אלהינו ותחגרו איש את כלי מלחמתו ותהינו לעלת ההרה

⁴²מב ויאמר יהוה אלי אמר להם לא תעלו ולא תלחמו--כי אינני בקרבכם ולא תנגפו לפני איביכם

⁴³מג ואדבר אליכם ולא שמעתם ותמרו את פי יהוה ותזדו ותעלו ההרה

⁴⁴מד ויצא האמרי הישב בהר ההוא לקראתכם וירדפו אתכם כאשר תעשינה הדברים ויכתו אתכם בשעיר עד חרמה

⁴⁵מה ותשבו ותבכו לפני יהוה ולא שמע יהוה בקלכם ולא האזין אליכם

⁴⁶מו ותשבו בקדש ימים רבים כימים אשר ישבתם