Read כֶּתֶר אֲרָם צוֹבָא - Tanah Aleppo Codex דברים 10 Bible Online

דברים 10 - כֶּתֶר אֲרָם צוֹבָא - Tanah Aleppo Codex bible

דברים 10

¹א בעת ההוא אמר יהוה אלי פסל לך שני לוחת אבנים כראשנים ועלה אלי ההרה ועשית לך ארון עץ

²ב ואכתב על הלחת את הדברים אשר היו על הלחת הראשנים אשר שברת ושמתם בארון

³ג ואעש ארון עצי שטים ואפסל שני לחת אבנים כראשנים ואעל ההרה ושני הלחת בידי

⁴ד ויכתב על הלחת כמכתב הראשון את עשרת הדברים אשר דבר יהוה אליכם בהר מתוך האש ביום הקהל ויתנם יהוה אלי

⁵ה ואפן וארד מן ההר ואשם את הלחת בארון אשר עשיתי ויהיו שם כאשר צוני יהוה

⁶ו ובני ישראל נסעו מבארת בני יעקן--מוסרה שם מת אהרן ויקבר שם ויכהן אלעזר בנו תחתיו

⁷ז משם נסעו הגדגדה ומן הגדגדה יטבתה ארץ נחלי מים

⁸ח בעת ההוא הבדיל יהוה את שבט הלוי לשאת את ארון ברית יהוה--לעמד לפני יהוה לשרתו ולברך בשמו עד היום הזה

⁹ט על כן לא היה ללוי חלק ונחלה--עם אחיו יהוה הוא נחלתו כאשר דבר יהוה אלהיך לו

¹⁰י ואנכי עמדתי בהר כימים הראשנים--ארבעים יום וארבעים לילה וישמע יהוה אלי גם בפעם ההוא--לא אבה יהוה השחיתך

¹¹יא ויאמר יהוה אלי קום לך למסע לפני העם ויבאו ויירשו את הארץ אשר נשבעתי לאבתם לתת להם {פ}

¹²יב ועתה ישראל--מה יהוה אלהיך שאל מעמך כי אם ליראה את יהוה אלהיך ללכת בכל דרכיו ולאהבה אתו ולעבד את יהוה אלהיך בכל לבבך ובכל נפשך

¹³יג לשמר את מצות יהוה ואת חקתיו אשר אנכי מצוך היום--לטוב לך

¹⁴יד הן ליהוה אלהיך השמים ושמי השמים הארץ וכל אשר בה

¹⁵טו רק באבתיך חשק יהוה לאהבה אותם ויבחר בזרעם אחריהם בכם מכל העמים--כיום הזה

¹⁶טז ומלתם את ערלת לבבכם וערפכם--לא תקשו עוד

¹⁷יז כי יהוה אלהיכם--הוא אלהי האלהים ואדני האדנים האל הגדל הגבר והנורא אשר לא ישא פנים ולא יקח שחד

¹⁸יח עשה משפט יתום ואלמנה ואהב גר לתת לו לחם ושמלה

¹⁹יט ואהבתם את הגר כי גרים הייתם בארץ מצרים

²⁰כ את יהוה אלהיך תירא אתו תעבד ובו תדבק ובשמו תשבע

²¹כא הוא תהלתך והוא אלהיך--אשר עשה אתך את הגדלת ואת הנוראת האלה אשר ראו עיניך

²²כב בשבעים נפש ירדו אבתיך מצרימה ועתה שמך יהוה אלהיך ככוכבי השמים לרב