Read כֶּתֶר אֲרָם צוֹבָא - Tanah Aleppo Codex דברים 14 Bible Online

דברים 14 - כֶּתֶר אֲרָם צוֹבָא - Tanah Aleppo Codex bible

דברים 14

¹א בנים אתם ליהוה אלהיכם לא תתגדדו ולא תשימו קרחה בין עיניכם--למת

²ב כי עם קדוש אתה ליהוה אלהיך ובך בחר יהוה להיות לו לעם סגלה מכל העמים אשר על פני האדמה {ס}

³ג לא תאכל כל תועבה

⁴ד זאת הבהמה אשר תאכלו שור שה כשבים ושה עזים

⁵ה איל וצבי ויחמור ואקו ודישן ותאו וזמר

⁶ו וכל בהמה מפרסת פרסה ושסעת שסע שתי פרסות מעלת גרה בבהמה--אתה תאכלו

⁷ז אך את זה לא תאכלו ממעלי הגרה וממפריסי הפרסה השסועה את הגמל ואת הארנבת ואת השפן כי מעלה גרה המה ופרסה לא הפריסו--טמאים הם לכם

⁸ח ואת החזיר כי מפריס פרסה הוא ולא גרה--טמא הוא לכם מבשרם לא תאכלו ובנבלתם לא תגעו {ס}

⁹ט את זה תאכלו מכל אשר במים כל אשר לו סנפיר וקשקשת תאכלו

¹⁰י וכל אשר אין לו סנפיר וקשקשת לא תאכלו--טמא הוא לכם {ס}

¹¹יא כל צפור טהרה תאכלו

¹²יב וזה אשר לא תאכלו מהם הנשר והפרס והעזניה

¹³יג והראה ואת האיה והדיה למינה

¹⁴יד ואת כל ערב למינו

¹⁵טו ואת בת היענה ואת התחמס ואת השחף ואת הנץ למינהו

¹⁶טז את הכוס ואת הינשוף והתנשמת

¹⁷יז והקאת ואת הרחמה ואת השלך

¹⁸יח והחסידה והאנפה למינה והדוכיפת והעטלף

¹⁹יט וכל שרץ העוף טמא הוא לכם לא יאכלו

²⁰כ כל עוף טהור תאכלו

²¹כא לא תאכלו כל נבלה לגר אשר בשעריך תתננה ואכלה או מכר לנכרי--כי עם קדוש אתה ליהוה אלהיך לא תבשל גדי בחלב אמו {פ}

²²כב עשר תעשר את כל תבואת זרעך היצא השדה שנה שנה

²³כג ואכלת לפני יהוה אלהיך במקום אשר יבחר לשכן שמו שם מעשר דגנך תירשך ויצהרך ובכרת בקרך וצאנך למען תלמד ליראה את יהוה אלהיך--כל הימים

²⁴כד וכי ירבה ממך הדרך כי לא תוכל שאתו--כי ירחק ממך המקום אשר יבחר יהוה אלהיך לשום שמו שם כי יברכך יהוה אלהיך

²⁵כה ונתתה בכסף וצרת הכסף בידך והלכת אל המקום אשר יבחר יהוה אלהיך בו

²⁶כו ונתתה הכסף בכל אשר תאוה נפשך בבקר ובצאן וביין ובשכר ובכל אשר תשאלך נפשך ואכלת שם לפני יהוה אלהיך ושמחת אתה וביתך

²⁷כז והלוי אשר בשעריך לא תעזבנו כי אין לו חלק ונחלה עמך {ס}

²⁸כח מקצה שלש שנים תוציא את כל מעשר תבואתך בשנה ההוא והנחת בשעריך

²⁹כט ובא הלוי כי אין לו חלק ונחלה עמך והגר והיתום והאלמנה אשר בשעריך ואכלו ושבעו--למען יברכך יהוה אלהיך בכל מעשה ידך אשר תעשה {ס}