Read כֶּתֶר אֲרָם צוֹבָא - Tanah Aleppo Codex דברים 16 Bible Online

דברים 16 - כֶּתֶר אֲרָם צוֹבָא - Tanah Aleppo Codex bible

דברים 16

¹א שמור את חדש האביב ועשית פסח ליהוה אלהיך כי בחדש האביב הוציאך יהוה אלהיך ממצרים--לילה

²ב וזבחת פסח ליהוה אלהיך צאן ובקר במקום אשר יבחר יהוה לשכן שמו שם

³ג לא תאכל עליו חמץ שבעת ימים תאכל עליו מצות לחם עני כי בחפזון יצאת מארץ מצרים--למען תזכר את יום צאתך מארץ מצרים כל ימי חייך

⁴ד ולא יראה לך שאר בכל גבלך שבעת ימים ולא ילין מן הבשר אשר תזבח בערב ביום הראשון--לבקר

⁵ה לא תוכל לזבח את הפסח באחד שעריך אשר יהוה אלהיך נתן לך

⁶ו כי אם אל המקום אשר יבחר יהוה אלהיך לשכן שמו--שם תזבח את הפסח בערב כבוא השמש מועד צאתך ממצרים

⁷ז ובשלת ואכלת במקום אשר יבחר יהוה אלהיך בו ופנית בבקר והלכת לאהליך

⁸ח ששת ימים תאכל מצות וביום השביעי עצרת ליהוה אלהיך--לא תעשה מלאכה {ס}

⁹ט שבעה שבעת תספר לך מהחל חרמש בקמה תחל לספר שבעה שבעות

¹⁰י ועשית חג שבעות ליהוה אלהיך--מסת נדבת ידך אשר תתן כאשר יברכך יהוה אלהיך

¹¹יא ושמחת לפני יהוה אלהיך אתה ובנך ובתך ועבדך ואמתך והלוי אשר בשעריך והגר והיתום והאלמנה אשר בקרבך--במקום אשר יבחר יהוה אלהיך לשכן שמו שם

¹²יב וזכרת כי עבד היית במצרים ושמרת ועשית את החקים האלה {פ}

¹³יג חג הסכת תעשה לך שבעת ימים באספך--מגרנך ומיקבך

¹⁴יד ושמחת בחגך אתה ובנך ובתך ועבדך ואמתך והלוי והגר והיתום והאלמנה אשר בשעריך

¹⁵טו שבעת ימים תחג ליהוה אלהיך במקום אשר יבחר יהוה כי יברכך יהוה אלהיך בכל תבואתך ובכל מעשה ידיך והיית אך שמח

¹⁶טז שלוש פעמים בשנה יראה כל זכורך את פני יהוה אלהיך במקום אשר יבחר--בחג המצות ובחג השבעות ובחג הסכות ולא יראה את פני יהוה ריקם

¹⁷יז איש כמתנת ידו כברכת יהוה אלהיך אשר נתן לך {ס}

¹⁸יח שפטים ושטרים תתן לך בכל שעריך אשר יהוה אלהיך נתן לך לשבטיך ושפטו את העם משפט צדק

¹⁹יט לא תטה משפט לא תכיר פנים ולא תקח שחד--כי השחד יעור עיני חכמים ויסלף דברי צדיקם

²⁰כ צדק צדק תרדף--למען תחיה וירשת את הארץ אשר יהוה אלהיך נתן לך {ס}

²¹כא לא תטע לך אשרה כל עץ אצל מזבח יהוה אלהיך--אשר תעשה לך

²²כב ולא תקים לך מצבה אשר שנא יהוה אלהיך {ס}