Read כֶּתֶר אֲרָם צוֹבָא - Tanah Aleppo Codex דברים 18 Bible Online

דברים 18 - כֶּתֶר אֲרָם צוֹבָא - Tanah Aleppo Codex bible

דברים 18

¹א לא יהיה לכהנים הלוים כל שבט לוי חלק ונחלה--עם ישראל אשי יהוה ונחלתו יאכלון

²ב ונחלה לא יהיה לו בקרב אחיו יהוה הוא נחלתו כאשר דבר לו {ס}

³ג וזה יהיה משפט הכהנים מאת העם מאת זבחי הזבח--אם שור אם שה ונתן לכהן הזרע והלחיים והקבה

⁴ד ראשית דגנך תירשך ויצהרך וראשית גז צאנך--תתן לו

⁵ה כי בו בחר יהוה אלהיך--מכל שבטיך לעמד לשרת בשם יהוה הוא ובניו כל הימים {ס}

⁶ו וכי יבא הלוי מאחד שעריך מכל ישראל אשר הוא גר שם ובא בכל אות נפשו אל המקום אשר יבחר יהוה

⁷ז ושרת בשם יהוה אלהיו--ככל אחיו הלוים העמדים שם לפני יהוה

⁸ח חלק כחלק יאכלו לבד ממכריו על האבות {ס}

⁹ט כי אתה בא אל הארץ אשר יהוה אלהיך נתן לך--לא תלמד לעשות כתועבת הגוים ההם

¹⁰י לא ימצא בך מעביר בנו ובתו באש קסם קסמים מעונן ומנחש ומכשף

¹¹יא וחבר חבר ושאל אוב וידעני ודרש אל המתים

¹²יב כי תועבת יהוה כל עשה אלה ובגלל התועבת האלה יהוה אלהיך מוריש אותם מפניך

¹³יג תמים תהיה עם יהוה אלהיך

¹⁴יד כי הגוים האלה אשר אתה יורש אותם--אל מעננים ואל קסמים ישמעו ואתה--לא כן נתן לך יהוה אלהיך

¹⁵טו נביא מקרבך מאחיך כמני יקים לך יהוה אלהיך אליו תשמעון

¹⁶טז ככל אשר שאלת מעם יהוה אלהיך בחרב ביום הקהל לאמר לא אסף לשמע את קול יהוה אלהי ואת האש הגדלה הזאת לא אראה עוד ולא אמות

¹⁷יז ויאמר יהוה אלי היטיבו אשר דברו

¹⁸יח נביא אקים להם מקרב אחיהם כמוך ונתתי דברי בפיו ודבר אליהם את כל אשר אצונו

¹⁹יט והיה האיש אשר לא ישמע אל דברי אשר ידבר בשמי--אנכי אדרש מעמו

²⁰כ אך הנביא אשר יזיד לדבר דבר בשמי את אשר לא צויתיו לדבר ואשר ידבר בשם אלהים אחרים--ומת הנביא ההוא

²¹כא וכי תאמר בלבבך איכה נדע את הדבר אשר לא דברו יהוה

²²כב אשר ידבר הנביא בשם יהוה ולא יהיה הדבר ולא יבא--הוא הדבר אשר לא דברו יהוה בזדון דברו הנביא לא תגור ממנו {ס}