Read כֶּתֶר אֲרָם צוֹבָא - Tanah Aleppo Codex דברים 20 Bible Online

דברים 20 - כֶּתֶר אֲרָם צוֹבָא - Tanah Aleppo Codex bible

דברים 20

¹א כי תצא למלחמה על איבך וראית סוס ורכב עם רב ממך--לא תירא מהם כי יהוה אלהיך עמך המעלך מארץ מצרים

²ב והיה כקרבכם אל המלחמה ונגש הכהן ודבר אל העם

³ג ואמר אלהם שמע ישראל אתם קרבים היום למלחמה על איביכם אל ירך לבבכם אל תיראו ואל תחפזו ואל תערצו--מפניהם

⁴ד כי יהוה אלהיכם ההלך עמכם--להלחם לכם עם איביכם להושיע אתכם

⁵ה ודברו השטרים אל העם לאמר מי האיש אשר בנה בית חדש ולא חנכו ילך וישב לביתו פן ימות במלחמה ואיש אחר יחנכנו

⁶ו ומי האיש אשר נטע כרם ולא חללו--ילך וישב לביתו פן ימות במלחמה ואיש אחר יחללנו

⁷ז ומי האיש אשר ארש אשה ולא לקחה--ילך וישב לביתו פן ימות במלחמה ואיש אחר יקחנה

⁸ח ויספו השטרים לדבר אל העם ואמרו מי האיש הירא ורך הלבב ילך וישב לביתו ולא ימס את לבב אחיו כלבבו

⁹ט והיה ככלת השטרים לדבר אל העם ופקדו שרי צבאות בראש העם {ס}

¹⁰י כי תקרב אל עיר להלחם עליה--וקראת אליה לשלום

¹¹יא והיה אם שלום תענך ופתחה לך והיה כל העם הנמצא בה יהיו לך למס--ועבדוך

¹²יב ואם לא תשלים עמך ועשתה עמך מלחמה--וצרת עליה

¹³יג ונתנה יהוה אלהיך בידך והכית את כל זכורה לפי חרב

¹⁴יד רק הנשים והטף והבהמה וכל אשר יהיה בעיר כל שללה--תבז לך ואכלת את שלל איביך אשר נתן יהוה אלהיך לך

¹⁵טו כן תעשה לכל הערים הרחקת ממך מאד אשר לא מערי הגוים האלה הנה

¹⁶טז רק מערי העמים האלה אשר יהוה אלהיך נתן לך נחלה--לא תחיה כל נשמה

¹⁷יז כי החרם תחרימם החתי והאמרי הכנעני והפרזי החוי והיבוסי--כאשר צוך יהוה אלהיך

¹⁸יח למען אשר לא ילמדו אתכם לעשות ככל תועבתם אשר עשו לאלהיהם וחטאתם ליהוה אלהיכם {ס}

¹⁹יט כי תצור אל עיר ימים רבים להלחם עליה לתפשה לא תשחית את עצה לנדח עליו גרזן--כי ממנו תאכל ואתו לא תכרת כי האדם עץ השדה לבא מפניך במצור

²⁰כ רק עץ אשר תדע כי לא עץ מאכל הוא--אתו תשחית וכרת ובנית מצור על העיר אשר הוא עשה עמך מלחמה--עד רדתה {פ}