Read כֶּתֶר אֲרָם צוֹבָא - Tanah Aleppo Codex דברים 21 Bible Online

דברים 21 - כֶּתֶר אֲרָם צוֹבָא - Tanah Aleppo Codex bible

דברים 21

¹א כי ימצא חלל באדמה אשר יהוה אלהיך נתן לך לרשתה נפל בשדה לא נודע מי הכהו

²ב ויצאו זקניך ושפטיך ומדדו אל הערים אשר סביבת החלל

³ג והיה העיר הקרבה אל החלל--ולקחו זקני העיר ההוא עגלת בקר אשר לא עבד בה אשר לא משכה בעל

⁴ד והורדו זקני העיר ההוא את העגלה אל נחל איתן אשר לא יעבד בו ולא יזרע וערפו שם את העגלה בנחל

⁵ה ונגשו הכהנים בני לוי--כי בם בחר יהוה אלהיך לשרתו ולברך בשם יהוה ועל פיהם יהיה כל ריב וכל נגע

⁶ו וכל זקני העיר ההוא הקרבים אל החלל--ירחצו את ידיהם על העגלה הערופה בנחל

⁷ז וענו ואמרו ידינו לא שפכה (שפכו) את הדם הזה ועינינו לא ראו

⁸ח כפר לעמך ישראל אשר פדית יהוה ואל תתן דם נקי בקרב עמך ישראל ונכפר להם הדם

⁹ט ואתה תבער הדם הנקי--מקרבך כי תעשה הישר בעיני יהוה {ס}

¹⁰י כי תצא למלחמה על איביך ונתנו יהוה אלהיך בידך--ושבית שביו

¹¹יא וראית בשביה אשת יפת תאר וחשקת בה ולקחת לך לאשה

¹²יב והבאתה אל תוך ביתך וגלחה את ראשה ועשתה את צפרניה

¹³יג והסירה את שמלת שביה מעליה וישבה בביתך ובכתה את אביה ואת אמה ירח ימים ואחר כן תבוא אליה ובעלתה והיתה לך לאשה

¹⁴יד והיה אם לא חפצת בה ושלחתה לנפשה ומכר לא תמכרנה בכסף לא תתעמר בה תחת אשר עניתה {ס}

¹⁵טו כי תהיין לאיש שתי נשים האחת אהובה והאחת שנואה וילדו לו בנים האהובה והשנואה והיה הבן הבכר לשניאה

¹⁶טז והיה ביום הנחילו את בניו את אשר יהיה לו--לא יוכל לבכר את בן האהובה על פני בן השנואה הבכר

¹⁷יז כי את הבכר בן השנואה יכיר לתת לו פי שנים בכל אשר ימצא לו כי הוא ראשית אנו לו משפט הבכרה {ס}

¹⁸יח כי יהיה לאיש בן סורר ומורה--איננו שמע בקול אביו ובקול אמו ויסרו אתו ולא ישמע אליהם

¹⁹יט ותפשו בו אביו ואמו והוציאו אתו אל זקני עירו ואל שער מקמו

²⁰כ ואמרו אל זקני עירו בננו זה סורר ומרה--איננו שמע בקלנו זולל וסבא

²¹כא ורגמהו כל אנשי עירו באבנים ומת ובערת הרע מקרבך וכל ישראל ישמעו ויראו {ס}

²²כב וכי יהיה באיש חטא משפט מות--והומת ותלית אתו על עץ

²³כג לא תלין נבלתו על העץ כי קבור תקברנו ביום ההוא--כי קללת אלהים תלוי ולא תטמא את אדמתך אשר יהוה אלהיך נתן לך נחלה {ס}