Read כֶּתֶר אֲרָם צוֹבָא - Tanah Aleppo Codex דברים 22 Bible Online

דברים 22 - כֶּתֶר אֲרָם צוֹבָא - Tanah Aleppo Codex bible

דברים 22

¹א לא תראה את שור אחיך או את שיו נדחים והתעלמת מהם השב תשיבם לאחיך

²ב ואם לא קרוב אחיך אליך ולא ידעתו--ואספתו אל תוך ביתך והיה עמך עד דרש אחיך אתו והשבתו לו

³ג וכן תעשה לחמרו וכן תעשה לשמלתו וכן תעשה לכל אבדת אחיך אשר תאבד ממנו ומצאתה לא תוכל להתעלם {ס}

⁴ד לא תראה את חמור אחיך או שורו נפלים בדרך והתעלמת מהם הקם תקים עמו {ס}

⁵ה לא יהיה כלי גבר על אשה ולא ילבש גבר שמלת אשה כי תועבת יהוה אלהיך כל עשה אלה {פ}

⁶ו כי יקרא קן צפור לפניך בדרך בכל עץ או על הארץ אפרחים או ביצים והאם רבצת על האפרחים או על הביצים--לא תקח האם על הבנים

⁷ז שלח תשלח את האם ואת הבנים תקח לך למען ייטב לך והארכת ימים {ס}

⁸ח כי תבנה בית חדש ועשית מעקה לגגך ולא תשים דמים בביתך כי יפל הנפל ממנו

⁹ט לא תזרע כרמך כלאים פן תקדש המלאה הזרע אשר תזרע ותבואת הכרם {ס}

¹⁰י לא תחרש בשור ובחמר יחדו

¹¹יא לא תלבש שעטנז צמר ופשתים יחדו {ס}

¹²יב גדלים תעשה לך על ארבע כנפות כסותך אשר תכסה בה {ס}

¹³יג כי יקח איש אשה ובא אליה ושנאה

¹⁴יד ושם לה עלילת דברים והוצא עליה שם רע ואמר את האשה הזאת לקחתי ואקרב אליה ולא מצאתי לה בתולים

¹⁵טו ולקח אבי הנער ואמה והוציאו את בתולי הנער אל זקני העיר--השערה

¹⁶טז ואמר אבי הנער אל הזקנים את בתי נתתי לאיש הזה לאשה--וישנאה

¹⁷יז והנה הוא שם עלילת דברים לאמר לא מצאתי לבתך בתולים ואלה בתולי בתי ופרשו השמלה לפני זקני העיר

¹⁸יח ולקחו זקני העיר ההוא את האיש ויסרו אתו

¹⁹יט וענשו אתו מאה כסף ונתנו לאבי הנערה--כי הוציא שם רע על בתולת ישראל ולו תהיה לאשה לא יוכל לשלחה כל ימיו {ס}

²⁰כ ואם אמת היה הדבר הזה לא נמצאו בתולים לנער

²¹כא והוציאו את הנער אל פתח בית אביה וסקלוה אנשי עירה באבנים ומתה--כי עשתה נבלה בישראל לזנות בית אביה ובערת הרע מקרבך {ס}

²²כב כי ימצא איש שכב עם אשה בעלת בעל ומתו גם שניהם--האיש השכב עם האשה והאשה ובערת הרע מישראל {ס}

²³כג כי יהיה נער בתולה מארשה לאיש ומצאה איש בעיר ושכב עמה

²⁴כד והוצאתם את שניהם אל שער העיר ההוא וסקלתם אתם באבנים ומתו--את הנער על דבר אשר לא צעקה בעיר ואת האיש על דבר אשר ענה את אשת רעהו ובערת הרע מקרבך {ס}

²⁵כה ואם בשדה ימצא האיש את הנער המארשה והחזיק בה האיש ושכב עמה ומת האיש אשר שכב עמה--לבדו

²⁶כו ולנער לא תעשה דבר אין לנער חטא מות כי כאשר יקום איש על רעהו ורצחו נפש--כן הדבר הזה

²⁷כז כי בשדה מצאה צעקה הנער המארשה ואין מושיע לה {ס}

²⁸כח כי ימצא איש נער בתולה אשר לא ארשה ותפשה ושכב עמה ונמצאו

²⁹כט ונתן האיש השכב עמה לאבי הנער--חמשים כסף ולו תהיה לאשה תחת אשר ענה--לא יוכל שלחה כל ימיו {ס}