Read כֶּתֶר אֲרָם צוֹבָא - Tanah Aleppo Codex דברים 23 Bible Online

דברים 23 - כֶּתֶר אֲרָם צוֹבָא - Tanah Aleppo Codex bible

דברים 23

¹א לא יקח איש את אשת אביו ולא יגלה כנף אביו {ס}

²ב לא יבא פצוע דכא וכרות שפכה בקהל יהוה {ס}

³ג לא יבא ממזר בקהל יהוה גם דור עשירי לא יבא לו בקהל יהוה {ס}

⁴ד לא יבא עמוני ומואבי בקהל יהוה גם דור עשירי לא יבא להם בקהל יהוה עד עולם

⁵ה על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור מפתור ארם נהרים--לקללך

⁶ו ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך

⁷ז לא תדרש שלמם וטבתם כל ימיך לעולם {ס}

⁸ח לא תתעב אדמי כי אחיך הוא לא תתעב מצרי כי גר היית בארצו

⁹ט בנים אשר יולדו להם דור שלישי--יבא להם בקהל יהוה {ס}

¹⁰י כי תצא מחנה על איביך ונשמרת--מכל דבר רע

¹¹יא כי יהיה בך איש אשר לא יהיה טהור מקרה לילה--ויצא אל מחוץ למחנה לא יבא אל תוך המחנה

¹²יב והיה לפנות ערב ירחץ במים וכבא השמש יבא אל תוך המחנה

¹³יג ויד תהיה לך מחוץ למחנה ויצאת שמה חוץ

¹⁴יד ויתד תהיה לך על אזנך והיה בשבתך חוץ וחפרתה בה ושבת וכסית את צאתך

¹⁵טו כי יהוה אלהיך מתהלך בקרב מחנך להצילך ולתת איביך לפניך והיה מחניך קדוש ולא יראה בך ערות דבר ושב מאחריך {ס}

¹⁶טז לא תסגיר עבד אל אדניו אשר ינצל אליך מעם אדניו

¹⁷יז עמך ישב בקרבך במקום אשר יבחר באחד שעריך--בטוב לו לא תוננו {ס}

¹⁸יח לא תהיה קדשה מבנות ישראל ולא יהיה קדש מבני ישראל

¹⁹יט לא תביא אתנן זונה ומחיר כלב בית יהוה אלהיך--לכל נדר כי תועבת יהוה אלהיך גם שניהם {ס}

²⁰כ לא תשיך לאחיך נשך כסף נשך אכל נשך כל דבר אשר ישך

²¹כא לנכרי תשיך ולאחיך לא תשיך--למען יברכך יהוה אלהיך בכל משלח ידך על הארץ אשר אתה בא שמה לרשתה {ס}

²²כב כי תדר נדר ליהוה אלהיך לא תאחר לשלמו כי דרש ידרשנו יהוה אלהיך מעמך והיה בך חטא

²³כג וכי תחדל לנדר--לא יהיה בך חטא

²⁴כד מוצא שפתיך תשמר ועשית כאשר נדרת ליהוה אלהיך נדבה אשר דברת בפיך {ס}

²⁵כה כי תבא בכרם רעך ואכלת ענבים כנפשך שבעך ואל כליך לא תתן {ס} [ (Deuteronomy 23:26) כו כי תבא בקמת רעך וקטפת מלילת בידך וחרמש לא תניף על קמת רעך {ס} ]