Read כֶּתֶר אֲרָם צוֹבָא - Tanah Aleppo Codex דברים 24 Bible Online

דברים 24 - כֶּתֶר אֲרָם צוֹבָא - Tanah Aleppo Codex bible

דברים 24

¹א כי יקח איש אשה ובעלה והיה אם לא תמצא חן בעיניו כי מצא בה ערות דבר--וכתב לה ספר כריתת ונתן בידה ושלחה מביתו

²ב ויצאה מביתו והלכה והיתה לאיש אחר

³ג ושנאה האיש האחרון וכתב לה ספר כריתת ונתן בידה ושלחה מביתו או כי ימות האיש האחרון אשר לקחה לו לאשה

⁴ד לא יוכל בעלה הראשון אשר שלחה לשוב לקחתה להיות לו לאשה אחרי אשר הטמאה--כי תועבה הוא לפני יהוה ולא תחטיא את הארץ אשר יהוה אלהיך נתן לך נחלה {ס}

⁵ה כי יקח איש אשה חדשה--לא יצא בצבא ולא יעבר עליו לכל דבר נקי יהיה לביתו שנה אחת ושמח את אשתו אשר לקח

⁶ו לא יחבל רחים ורכב כי נפש הוא חבל {ס}

⁷ז כי ימצא איש גנב נפש מאחיו מבני ישראל והתעמר בו ומכרו--ומת הגנב ההוא ובערת הרע מקרבך {ס}

⁸ח השמר בנגע הצרעת לשמר מאד ולעשות ככל אשר יורו אתכם הכהנים הלוים כאשר צויתם--תשמרו לעשות

⁹ט זכור את אשר עשה יהוה אלהיך למרים בדרך בצאתכם ממצרים {ס}

¹⁰י כי תשה ברעך משאת מאומה--לא תבא אל ביתו לעבט עבטו

¹¹יא בחוץ תעמד והאיש אשר אתה נשה בו יוציא אליך את העבוט החוצה

¹²יב ואם איש עני הוא--לא תשכב בעבטו

¹³יג השב תשיב לו את העבוט כבוא השמש ושכב בשלמתו וברכך ולך תהיה צדקה לפני יהוה אלהיך {ס}

¹⁴יד לא תעשק שכיר עני ואביון מאחיך או מגרך אשר בארצך בשעריך

¹⁵טו ביומו תתן שכרו ולא תבוא עליו השמש כי עני הוא ואליו הוא נשא את נפשו ולא יקרא עליך אל יהוה והיה בך חטא {ס}

¹⁶טז לא יומתו אבות על בנים ובנים לא יומתו על אבות איש בחטאו יומתו {ס}

¹⁷יז לא תטה משפט גר יתום ולא תחבל בגד אלמנה

¹⁸יח וזכרת כי עבד היית במצרים ויפדך יהוה אלהיך משם על כן אנכי מצוך לעשות את הדבר הזה {ס}

¹⁹יט כי תקצר קצירך בשדך ושכחת עמר בשדה לא תשוב לקחתו--לגר ליתום ולאלמנה יהיה למען יברכך יהוה אלהיך בכל מעשה ידיך {ס}

²⁰כ כי תחבט זיתך לא תפאר אחריך לגר ליתום ולאלמנה יהיה

²¹כא כי תבצר כרמך לא תעולל אחריך לגר ליתום ולאלמנה יהיה

²²כב וזכרת כי עבד היית בארץ מצרים על כן אנכי מצוך לעשות את הדבר הזה {ס}