Read כֶּתֶר אֲרָם צוֹבָא - Tanah Aleppo Codex דברים 25 Bible Online

דברים 25 - כֶּתֶר אֲרָם צוֹבָא - Tanah Aleppo Codex bible

דברים 25

¹א כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע

²ב והיה אם בן הכות הרשע--והפילו השפט והכהו לפניו כדי רשעתו במספר

³ג ארבעים יכנו לא יסיף פן יסיף להכתו על אלה מכה רבה ונקלה אחיך לעיניך

⁴ד לא תחסם שור בדישו {ס}

⁵ה כי ישבו אחים יחדו ומת אחד מהם ובן אין לו--לא תהיה אשת המת החוצה לאיש זר יבמה יבא עליה ולקחה לו לאשה ויבמה

⁶ו והיה הבכור אשר תלד--יקום על שם אחיו המת ולא ימחה שמו מישראל

⁷ז ואם לא יחפץ האיש לקחת את יבמתו ועלתה יבמתו השערה אל הזקנים ואמרה מאן יבמי להקים לאחיו שם בישראל--לא אבה יבמי

⁸ח וקראו לו זקני עירו ודברו אליו ועמד ואמר לא חפצתי לקחתה

⁹ט ונגשה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשה לאיש אשר לא יבנה את בית אחיו

¹⁰י ונקרא שמו בישראל בית חלוץ הנעל {ס}

¹¹יא כי ינצו אנשים יחדו איש ואחיו וקרבה אשת האחד להציל את אישה מיד מכהו ושלחה ידה והחזיקה במבשיו

¹²יב וקצתה את כפה לא תחוס עינך {ס}

¹³יג לא יהיה לך בכיסך אבן ואבן גדולה וקטנה

¹⁴יד לא יהיה לך בביתך איפה ואיפה גדולה וקטנה

¹⁵טו אבן שלמה וצדק יהיה לך איפה שלמה וצדק יהיה לך--למען יאריכו ימיך על האדמה אשר יהוה אלהיך נתן לך

¹⁶טז כי תועבת יהוה אלהיך כל עשה אלה כל עשה עול {פ}

¹⁷יז זכור את אשר עשה לך עמלק בדרך בצאתכם ממצרים

¹⁸יח אשר קרך בדרך ויזנב בך כל הנחשלים אחריך--ואתה עיף ויגע ולא ירא אלהים

¹⁹יט והיה בהניח יהוה אלהיך לך מכל איביך מסביב בארץ אשר יהוה אלהיך נתן לך נחלה לרשתה--תמחה את זכר עמלק מתחת השמים לא תשכח {פ}