Read כֶּתֶר אֲרָם צוֹבָא - Tanah Aleppo Codex דברים 27 Bible Online

דברים 27 - כֶּתֶר אֲרָם צוֹבָא - Tanah Aleppo Codex bible

דברים 27

¹א ויצו משה וזקני ישראל את העם לאמר שמר את כל המצוה אשר אנכי מצוה אתכם היום

²ב והיה ביום אשר תעברו את הירדן אל הארץ אשר יהוה אלהיך נתן לך--והקמת לך אבנים גדלות ושדת אתם בשיד

³ג וכתבת עליהן את כל דברי התורה הזאת--בעברך למען אשר תבא אל הארץ אשר יהוה אלהיך נתן לך ארץ זבת חלב ודבש כאשר דבר יהוה אלהי אבתיך לך

⁴ד והיה בעברכם את הירדן תקימו את האבנים האלה אשר אנכי מצוה אתכם היום בהר עיבל ושדת אותם בשיד

⁵ה ובנית שם מזבח ליהוה אלהיך מזבח אבנים לא תניף עליהם ברזל

⁶ו אבנים שלמות תבנה את מזבח יהוה אלהיך והעלית עליו עולת ליהוה אלהיך

⁷ז וזבחת שלמים ואכלת שם ושמחת לפני יהוה אלהיך

⁸ח וכתבת על האבנים את כל דברי התורה הזאת--באר היטב {ס}

⁹ט וידבר משה והכהנים הלוים אל כל ישראל לאמר הסכת ושמע ישראל היום הזה נהיית לעם ליהוה אלהיך

¹⁰י ושמעת בקול יהוה אלהיך ועשית את מצותו ואת חקיו אשר אנכי מצוך היום {ס}

¹¹יא ויצו משה את העם ביום ההוא לאמר

¹²יב אלה יעמדו לברך את העם על הר גרזים בעברכם את הירדן שמעון ולוי ויהודה ויששכר ויוסף ובנימן

¹³יג ואלה יעמדו על הקללה בהר עיבל ראובן גד ואשר וזבולן דן ונפתלי

¹⁴יד וענו הלוים ואמרו אל כל איש ישראל--קול רם {ס}

¹⁵טו ארור האיש אשר יעשה פסל ומסכה תועבת יהוה מעשה ידי חרש--ושם בסתר וענו כל העם ואמרו אמן {ס}

¹⁶טז ארור מקלה אביו ואמו ואמר כל העם אמן {ס}

¹⁷יז ארור מסיג גבול רעהו ואמר כל העם אמן {ס}

¹⁸יח ארור משגה עור בדרך ואמר כל העם אמן {ס}

¹⁹יט ארור מטה משפט גר יתום--ואלמנה ואמר כל העם אמן

²⁰כ ארור שכב עם אשת אביו--כי גלה כנף אביו ואמר כל העם אמן {ס}

²¹כא ארור שכב עם כל בהמה ואמר כל העם אמן {ס}

²²כב ארור שכב עם אחתו--בת אביו או בת אמו ואמר כל העם אמן {ס}

²³כג ארור שכב עם חתנתו ואמר כל העם אמן {ס}

²⁴כד ארור מכה רעהו בסתר ואמר כל העם אמן {ס}

²⁵כה ארור לקח שחד להכות נפש דם נקי ואמר כל העם אמן {ס}

²⁶כו ארור אשר לא יקים את דברי התורה הזאת--לעשות אותם ואמר כל העם אמן {פ}