Read כֶּתֶר אֲרָם צוֹבָא - Tanah Aleppo Codex דברים 32 Bible Online

דברים 32 - כֶּתֶר אֲרָם צוֹבָא - Tanah Aleppo Codex bible

דברים 32

¹א האזינו השמים ואדברה {ס} ותשמע הארץ אמרי פי {ר}

²ב יערף כמטר לקחי {ס} תזל כטל אמרתי {ר} כשעירם עלי דשא {ס} וכרביבים עלי עשב {ר}

³ג כי שם יהוה אקרא {ס} הבו גדל לאלהינו {ר}

⁴ד הצור תמים פעלו {ס} כי כל דרכיו משפט {ר} אל אמונה ואין עול {ס} צדיק וישר הוא {ר}

⁵ה שחת לו לא בניו מומם {ס} דור עקש ופתלתל {ר}

⁶ו ה ליהוה תגמלו זאת-- {ס} עם נבל ולא חכם {ר} הלוא הוא אביך קנך {ס} הוא עשך ויכננך {ר}

⁷ז זכר ימות עולם בינו שנות דר ודר {ס} שאל אביך ויגדך זקניך ויאמרו לך {ר}

⁸ח בהנחל עליון גוים {ס} בהפרידו בני אדם {ר} יצב גבלת עמים {ס} למספר בני ישראל {ר}

⁹ט כי חלק יהוה עמו {ס} יעקב חבל נחלתו {ר}

¹⁰י ימצאהו בארץ מדבר {ס} ובתהו ילל ישמן {ר} יסבבנהו יבוננהו-- {ס} יצרנהו כאישון עינו {ר}

¹¹יא כנשר יעיר קנו על גוזליו ירחף {ס} יפרש כנפיו יקחהו ישאהו על אברתו {ר}

¹²יב יהוה בדד ינחנו {ס} ואין עמו אל נכר {ר}

¹³יג ירכבהו על במותי (במתי) ארץ {ס} ויאכל תנובת שדי {ר} וינקהו דבש מסלע {ס} ושמן מחלמיש צור {ר}

¹⁴יד חמאת בקר וחלב צאן {ס} עם חלב כרים ואילים {ר} בני בשן ועתודים {ס} עם חלב כליות חטה {ר} ודם ענב תשתה חמר {ס}

¹⁵טו וישמן ישרון ויבעט {ר} שמנת עבית כשית {ס} ויטש אלוה עשהו {ר} וינבל צור ישעתו {ס}

¹⁶טז יקנאהו בזרים {ר} בתועבת יכעיסהו {ס}

¹⁷יז יזבחו לשדים לא אלה-- {ר} אלהים לא ידעום {ס} חדשים מקרב באו {ר} לא שערום אבתיכם {ס}

¹⁸יח צור ילדך תשי {ר} ותשכח אל מחללך {ס}

¹⁹יט וירא יהוה וינאץ {ר} מכעס בניו ובנתיו {ס}

²⁰כ ויאמר אסתירה פני מהם-- {ר} אראה מה אחריתם {ס} כי דור תהפכת המה {ר} בנים לא אמן בם {ס}

²¹כא הם קנאוני בלא אל {ר} כעסוני בהבליהם {ס} ואני אקניאם בלא עם {ר} בגוי נבל אכעיסם {ס}

²²כב כי אש קדחה באפי {ר} ותיקד עד שאול תחתית {ס} ותאכל ארץ ויבלה {ר} ותלהט מוסדי הרים {ס}

²³כג אספה עלימו רעות {ר} חצי אכלה בם {ס}

²⁴כד מזי רעב ולחמי רשף {ר} וקטב מרירי {ס} ושן בהמת אשלח בם {ר} עם חמת זחלי עפר {ס}

²⁵כה מחוץ תשכל חרב ומחדרים אימה גם בחור {ר} גם בתולה--יונק עם איש שיבה {ס}

²⁶כו אמרתי אפאיהם {ר} אשביתה מאנוש זכרם {ס}

²⁷כז לולי כעס אויב אגור-- {ר} פן ינכרו צרימו {ס} פן יאמרו ידנו רמה {ר} ולא יהוה פעל כל זאת {ס}

²⁸כח כי גוי אבד עצות המה {ר} ואין בהם תבונה {ס}

²⁹כט לו חכמו ישכילו זאת {ר} יבינו לאחריתם {ס}

³⁰ל איכה ירדף אחד אלף {ר} ושנים יניסו רבבה {ס} אם לא כי צורם מכרם {ר} ויהוה הסגירם {ס}

³¹לא כי לא כצורנו צורם {ר} ואיבינו פלילים {ס}

³²לב כי מגפן סדם גפנם {ר} ומשדמת עמרה {ס} ענבמו ענבי רוש-- {ר} אשכלת מררת למו {ס}

³³לג חמת תנינם יינם {ר} וראש פתנים אכזר {ס}

³⁴לד הלא הוא כמס עמדי {ר} חתום באוצרתי {ס}

³⁵לה לי נקם ושלם {ר} לעת תמוט רגלם {ס} כי קרוב יום אידם {ר} וחש עתדת למו {ס}

³⁶לו כי ידין יהוה עמו {ר} ועל עבדיו יתנחם {ס} כי יראה כי אזלת יד {ר} ואפס עצור ועזוב {ס}

³⁷לז ואמר אי אלהימו-- {ר} צור חסיו בו {ס}

³⁸לח אשר חלב זבחימו יאכלו {ר} ישתו יין נסיכם {ס} יקומו ויעזרכם-- {ר} יהי עליכם סתרה {ס}

³⁹לט ראו עתה כי אני אני הוא {ר} ואין אלהים עמדי {ס} אני אמית ואחיה {ר} מחצתי ואני ארפא {ס} ואין מידי מציל {ר}

⁴⁰מ כי אשא אל שמים ידי {ס} ואמרתי חי אנכי לעלם {ר}

⁴¹מא אם שנותי ברק חרבי {ס} ותאחז במשפט ידי {ר} אשיב נקם לצרי {ס} ולמשנאי אשלם {ר}

⁴²מב אשכיר חצי מדם {ס} וחרבי תאכל בשר {ר} מדם חלל ושביה {ס} מראש פרעות אויב {ר}

⁴³מג הרנינו גוים עמו {ס} כי דם עבדיו יקום {ר} ונקם ישיב לצריו {ס} וכפר אדמתו עמו {ר} {ש}

⁴⁴מד ויבא משה וידבר את כל דברי השירה הזאת--באזני העם הוא והושע בן נון

⁴⁵מה ויכל משה לדבר את כל הדברים האלה--אל כל ישראל

⁴⁶מו ויאמר אלהם שימו לבבכם לכל הדברים אשר אנכי מעיד בכם היום אשר תצום את בניכם לשמר לעשות את כל דברי התורה הזאת

⁴⁷מז כי לא דבר רק הוא מכם--כי הוא חייכם ובדבר הזה תאריכו ימים על האדמה אשר אתם עברים את הירדן שמה לרשתה {פ}

⁴⁸מח וידבר יהוה אל משה בעצם היום הזה לאמר

⁴⁹מט עלה אל הר העברים הזה הר נבו אשר בארץ מואב אשר על פני ירחו וראה את ארץ כנען אשר אני נתן לבני ישראל לאחזה

⁵⁰נ ומת בהר אשר אתה עלה שמה והאסף אל עמיך כאשר מת אהרן אחיך בהר ההר ויאסף אל עמיו

⁵¹נא על אשר מעלתם בי בתוך בני ישראל במי מריבת קדש מדבר צן--על אשר לא קדשתם אותי בתוך בני ישראל

⁵²נב כי מנגד תראה את הארץ ושמה לא תבוא--אל הארץ אשר אני נתן לבני ישראל {פ}