Read כֶּתֶר אֲרָם צוֹבָא - Tanah Aleppo Codex דברים 6 Bible Online

דברים 6 - כֶּתֶר אֲרָם צוֹבָא - Tanah Aleppo Codex bible

דברים 6

¹א וזאת המצוה החקים והמשפטים אשר צוה יהוה אלהיכם ללמד אתכם--לעשות בארץ אשר אתם עברים שמה לרשתה

²ב למען תירא את יהוה אלהיך לשמר את כל חקתיו ומצותיו אשר אנכי מצוך אתה ובנך ובן בנך כל ימי חייך--ולמען יארכן ימיך

³ג ושמעת ישראל ושמרת לעשות אשר ייטב לך ואשר תרבון מאד כאשר דבר יהוה אלהי אבתיך לך--ארץ זבת חלב ודבש {פ}

⁴ד שמע ישראל יהוה אלהינו יהוה אחד

⁵ה ואהבת את יהוה אלהיך בכל לבבך ובכל נפשך ובכל מאדך

⁶ו והיו הדברים האלה אשר אנכי מצוך היום--על לבבך

⁷ז ושננתם לבניך ודברת בם בשבתך בביתך ובלכתך בדרך ובשכבך ובקומך

⁸ח וקשרתם לאות על ידך והיו לטטפת בין עיניך

⁹ט וכתבתם על מזזות ביתך ובשעריך {ס}

¹⁰י והיה כי יביאך יהוה אלהיך אל הארץ אשר נשבע לאבתיך לאברהם ליצחק וליעקב--לתת לך ערים גדלת וטבת אשר לא בנית

¹¹יא ובתים מלאים כל טוב אשר לא מלאת וברת חצובים אשר לא חצבת כרמים וזיתים אשר לא נטעת ואכלת ושבעת

¹²יב השמר לך פן תשכח את יהוה אשר הוציאך מארץ מצרים מבית עבדים

¹³יג את יהוה אלהיך תירא ואתו תעבד ובשמו תשבע

¹⁴יד לא תלכון אחרי אלהים אחרים--מאלהי העמים אשר סביבותיכם

¹⁵טו כי אל קנא יהוה אלהיך בקרבך פן יחרה אף יהוה אלהיך בך והשמידך מעל פני האדמה {ס}

¹⁶טז לא תנסו את יהוה אלהיכם כאשר נסיתם במסה

¹⁷יז שמור תשמרון את מצות יהוה אלהיכם ועדתיו וחקיו אשר צוך

¹⁸יח ועשית הישר והטוב בעיני יהוה--למען ייטב לך ובאת וירשת את הארץ הטבה אשר נשבע יהוה לאבתיך

¹⁹יט להדף את כל איביך מפניך כאשר דבר יהוה {ס}

²⁰כ כי ישאלך בנך מחר לאמר מה העדת והחקים והמשפטים אשר צוה יהוה אלהינו אתכם

²¹כא ואמרת לבנך עבדים היינו לפרעה במצרים ויציאנו יהוה ממצרים ביד חזקה

²²כב ויתן יהוה אותת ומפתים גדלים ורעים במצרים בפרעה ובכל ביתו--לעינינו

²³כג ואותנו הוציא משם--למען הביא אתנו לתת לנו את הארץ אשר נשבע לאבתינו

²⁴כד ויצונו יהוה לעשות את כל החקים האלה ליראה את יהוה אלהינו--לטוב לנו כל הימים לחיתנו כהיום הזה

²⁵כה וצדקה תהיה לנו כי נשמר לעשות את כל המצוה הזאת לפני יהוה אלהינו--כאשר צונו {ס}