Read כֶּתֶר אֲרָם צוֹבָא - Tanah Aleppo Codex דברים 8 Bible Online

דברים 8 - כֶּתֶר אֲרָם צוֹבָא - Tanah Aleppo Codex bible

דברים 8

¹א כל המצוה אשר אנכי מצוך היום--תשמרון לעשות למען תחיון ורביתם ובאתם וירשתם את הארץ אשר נשבע יהוה לאבתיכם

²ב וזכרת את כל הדרך אשר הוליכך יהוה אלהיך זה ארבעים שנה--במדבר למען ענתך לנסתך לדעת את אשר בלבבך התשמר מצותו--אם לא

³ג ויענך וירעבך ויאכלך את המן אשר לא ידעת ולא ידעון אבתיך למען הודיעך כי לא על הלחם לבדו יחיה האדם--כי על כל מוצא פי יהוה יחיה האדם

⁴ד שמלתך לא בלתה מעליך ורגלך לא בצקה--זה ארבעים שנה

⁵ה וידעת עם לבבך כי כאשר ייסר איש את בנו יהוה אלהיך מיסרך

⁶ו ושמרת את מצות יהוה אלהיך ללכת בדרכיו וליראה אתו

⁷ז כי יהוה אלהיך מביאך אל ארץ טובה ארץ נחלי מים--עינת ותהמת יצאים בבקעה ובהר

⁸ח ארץ חטה ושערה וגפן ותאנה ורמון ארץ זית שמן ודבש

⁹ט ארץ אשר לא במסכנת תאכל בה לחם--לא תחסר כל בה ארץ אשר אבניה ברזל ומהרריה תחצב נחשת

¹⁰י ואכלת ושבעת--וברכת את יהוה אלהיך על הארץ הטבה אשר נתן לך

¹¹יא השמר לך פן תשכח את יהוה אלהיך לבלתי שמר מצותיו ומשפטיו וחקתיו אשר אנכי מצוך היום

¹²יב פן תאכל ושבעת ובתים טבים תבנה וישבת

¹³יג ובקרך וצאנך ירבין וכסף וזהב ירבה לך וכל אשר לך ירבה

¹⁴יד ורם לבבך ושכחת את יהוה אלהיך המוציאך מארץ מצרים מבית עבדים

¹⁵טו המוליכך במדבר הגדל והנורא נחש שרף ועקרב וצמאון אשר אין מים המוציא לך מים מצור החלמיש

¹⁶טז המאכלך מן במדבר אשר לא ידעון אבתיך למען ענתך ולמען נסתך--להיטבך באחריתך

¹⁷יז ואמרת בלבבך כחי ועצם ידי עשה לי את החיל הזה

¹⁸יח וזכרת את יהוה אלהיך--כי הוא הנתן לך כח לעשות חיל למען הקים את בריתו אשר נשבע לאבתיך כיום הזה {פ}

¹⁹יט והיה אם שכח תשכח את יהוה אלהיך והלכת אחרי אלהים אחרים ועבדתם והשתחוית להם--העדתי בכם היום כי אבד תאבדון

²⁰כ כגוים אשר יהוה מאביד מפניכם--כן תאבדון עקב לא תשמעון בקול יהוה אלהיכם {פ}