Read כֶּתֶר אֲרָם צוֹבָא - Tanah Aleppo Codex יהושע 13 Bible Online

יהושע 13 - כֶּתֶר אֲרָם צוֹבָא - Tanah Aleppo Codex bible

יהושע 13

¹א ויהושע זקן בא בימים ויאמר יהוה אליו אתה זקנתה באת בימים והארץ נשארה הרבה מאד לרשתה

²ב זאת הארץ הנשארת כל גלילות הפלשתים וכל הגשורי

³ג מן השיחור אשר על פני מצרים ועד גבול עקרון צפונה--לכנעני תחשב חמשת סרני פלשתים העזתי והאשדודי האשקלוני הגתי והעקרוני והעוים

⁴ד מתימן כל ארץ הכנעני ומערה אשר לצידנים--עד אפקה עד גבול האמרי

⁵ה והארץ הגבלי וכל הלבנון מזרח השמש מבעל גד תחת הר חרמון--עד לבוא חמת

⁶ו כל ישבי ההר מן הלבנון עד משרפת מים כל צידנים--אנכי אורישם מפני בני ישראל רק הפלה לישראל בנחלה כאשר צויתיך

⁷ז ועתה חלק את הארץ הזאת בנחלה--לתשעת השבטים וחצי השבט המנשה

⁸ח עמו הראובני והגדי לקחו נחלתם--אשר נתן להם משה בעבר הירדן מזרחה כאשר נתן להם משה עבד יהוה

⁹ט מערוער אשר על שפת נחל ארנון והעיר אשר בתוך הנחל וכל המישר מידבא--עד דיבון

¹⁰י וכל ערי סיחון מלך האמרי אשר מלך בחשבון--עד גבול בני עמון

¹¹יא והגלעד וגבול הגשורי והמעכתי וכל הר חרמון וכל הבשן--עד סלכה

¹²יב כל ממלכות עוג בבשן אשר מלך בעשתרות ובאדרעי הוא נשאר מיתר הרפאים ויכם משה וירשם

¹³יג ולא הורישו בני ישראל את הגשורי ואת המעכתי וישב גשור ומעכת בקרב ישראל עד היום הזה

¹⁴יד רק לשבט הלוי לא נתן נחלה אשי יהוה אלהי ישראל הוא נחלתו כאשר דבר לו {פ}

¹⁵טו ויתן משה למטה בני ראובן למשפחתם

¹⁶טז ויהי להם הגבול מערוער אשר על שפת נחל ארנון והעיר אשר בתוך הנחל וכל המישר--על מידבא

¹⁷יז חשבון וכל עריה אשר במישר דיבן ובמות בעל ובית בעל מעון

¹⁸יח ויהצה וקדמת ומפעת

¹⁹יט וקריתים ושבמה וצרת השחר בהר העמק

²⁰כ ובית פעור ואשדות הפסגה ובית הישמות

²¹כא וכל ערי המישר וכל ממלכות סיחון מלך האמרי אשר מלך בחשבון אשר הכה משה אתו ואת נשיאי מדין את אוי ואת רקם ואת צור ואת חור ואת רבע נסיכי סיחון ישבי הארץ

²²כב ואת בלעם בן בעור הקוסם--הרגו בני ישראל בחרב אל חלליהם

²³כג ויהי גבול בני ראובן--הירדן וגבול זאת נחלת בני ראובן למשפחותם הערים וחצריהן {פ}

²⁴כד ויתן משה למטה גד לבני גד למשפחתם

²⁵כה ויהי להם הגבול--יעזר וכל ערי הגלעד וחצי ארץ בני עמון עד ערוער אשר על פני רבה

²⁶כו ומחשבון עד רמת המצפה ובטנים וממחנים עד גבול לדבר

²⁷כז ובעמק בית הרם ובית נמרה וסכות וצפון יתר ממלכות סיחון מלך חשבון הירדן וגבל--עד קצה ים כנרת עבר הירדן מזרחה

²⁸כח זאת נחלת בני גד למשפחתם הערים וחצריהם {ס}

²⁹כט ויתן משה לחצי שבט מנשה ויהי לחצי מטה בני מנשה--למשפחותם

³⁰ל ויהי גבולם ממחנים כל הבשן כל ממלכות עוג מלך הבשן וכל חות יאיר אשר בבשן--ששים עיר

³¹לא וחצי הגלעד ועשתרות ואדרעי ערי ממלכות עוג בבשן לבני מכיר בן מנשה לחצי בני מכיר למשפחותם

³²לב אלה אשר נחל משה בערבות מואב מעבר לירדן יריחו מזרחה {פ}

³³לג ולשבט הלוי--לא נתן משה נחלה יהוה אלהי ישראל הוא נחלתם כאשר דבר להם {ס}