Read כֶּתֶר אֲרָם צוֹבָא - Tanah Aleppo Codex יהושע 15 Bible Online

יהושע 15 - כֶּתֶר אֲרָם צוֹבָא - Tanah Aleppo Codex bible

יהושע 15

¹א ויהי הגורל למטה בני יהודה--למשפחתם אל גבול אדום מדבר צן נגבה מקצה תימן

²ב ויהי להם גבול נגב מקצה ים המלח מן הלשן הפנה נגבה

³ג ויצא אל מנגב למעלה עקרבים ועבר צנה ועלה מנגב לקדש ברנע ועבר חצרון ועלה אדרה ונסב הקרקעה

⁴ד ועבר עצמונה ויצא נחל מצרים והיה (והיו) תצאות הגבול ימה זה יהיה לכם גבול נגב

⁵ה וגבול קדמה ים המלח עד קצה הירדן וגבול לפאת צפונה מלשון הים מקצה הירדן

⁶ו ועלה הגבול בית חגלה ועבר מצפון לבית הערבה ועלה הגבול אבן בהן בן ראובן

⁷ז ועלה הגבול דברה מעמק עכור וצפונה פנה אל הגלגל אשר נכח למעלה אדמים אשר מנגב לנחל ועבר הגבול אל מי עין שמש והיו תצאתיו אל עין רגל

⁸ח ועלה הגבול גי בן הנם אל כתף היבוסי מנגב--היא ירושלם ועלה הגבול אל ראש ההר אשר על פני גי הנם ימה אשר בקצה עמק רפאים צפונה

⁹ט ותאר הגבול מראש ההר אל מעין מי נפתוח ויצא אל ערי הר עפרון ותאר הגבול בעלה היא קרית יערים

¹⁰י ונסב הגבול מבעלה ימה אל הר שעיר ועבר אל כתף הר יערים מצפונה היא כסלון וירד בית שמש ועבר תמנה

¹¹יא ויצא הגבול אל כתף עקרון צפונה ותאר הגבול שכרונה ועבר הר הבעלה ויצא יבנאל והיו תצאות הגבול ימה

¹²יב וגבול ים הימה הגדול וגבול זה גבול בני יהודה סביב--למשפחתם

¹³יג ולכלב בן יפנה נתן חלק בתוך בני יהודה אל פי יהוה ליהושע--את קרית ארבע אבי הענק היא חברון

¹⁴יד וירש משם כלב את שלושה בני הענק--את ששי ואת אחימן ואת תלמי ילידי הענק

¹⁵טו ויעל משם אל ישבי דבר ושם דבר לפנים קרית ספר

¹⁶טז ויאמר כלב אשר יכה את קרית ספר ולכדה--ונתתי לו את עכסה בתי לאשה

¹⁷יז וילכדה עתניאל בן קנז אחי כלב ויתן לו את עכסה בתו לאשה

¹⁸יח ויהי בבואה ותסיתהו לשאול מאת אביה שדה ותצנח מעל החמור ויאמר לה כלב מה לך

¹⁹יט ותאמר תנה לי ברכה כי ארץ הנגב נתתני ונתתה לי גלת מים ויתן לה את גלת עליות ואת גלת תחתיות {פ}

²⁰כ זאת נחלת מטה בני יהודה--למשפחתם

²¹כא ויהיו הערים מקצה למטה בני יהודה אל גבול אדום בנגבה--קבצאל ועדר ויגור

²²כב וקינה ודימונה ועדעדה

²³כג וקדש וחצור ויתנן

²⁴כד זיף וטלם ובעלות

²⁵כה וחצור חדתה וקריות חצרון היא חצור

²⁶כו אמם ושמע ומולדה

²⁷כז וחצר גדה וחשמון ובית פלט

²⁸כח וחצר שועל ובאר שבע ובזיותיה

²⁹כט בעלה ועיים ועצם

³⁰ל ואלתולד וכסיל וחרמה

³¹לא וצקלג ומדמנה וסנסנה

³²לב ולבאות ושלחים ועין ורמון כל ערים עשרים ותשע וחצריהן {ס}

³³לג בשפלה--אשתאול וצרעה ואשנה

³⁴לד וזנוח ועין גנים תפוח והעינם

³⁵לה ירמות ועדלם שוכה ועזקה

³⁶לו ושערים ועדיתים והגדרה וגדרתים ערים ארבע עשרה וחצריהן {ס}

³⁷לז צנן וחדשה ומגדל גד

³⁸לח ודלען והמצפה ויקתאל

³⁹לט לכיש ובצקת ועגלון

⁴⁰מ וכבון ולחמס וכתליש

⁴¹מא וגדרות בית דגון ונעמה ומקדה ערים שש עשרה וחצריהן {ס}

⁴²מב לבנה ועתר ועשן

⁴³מג ויפתח ואשנה ונציב

⁴⁴מד וקעילה ואכזיב ומראשה ערים תשע וחצריהן {ס}

⁴⁵מה עקרון ובנתיה וחצריה

⁴⁶מו מעקרון וימה כל אשר על יד אשדוד וחצריהן {ס}

⁴⁷מז אשדוד בנותיה וחצריה עזה בנותיה וחצריה--עד נחל מצרים והים הגבול (הגדול) וגבול {ס}

⁴⁸מח ובהר--שמיר ויתיר ושוכה

⁴⁹מט ודנה וקרית סנה היא דבר {ס}

⁵⁰נ וענב ואשתמה וענים

⁵¹נא וגשן וחלן וגלה ערים אחת עשרה וחצריהן {ס}

⁵²נב ארב ורומה ואשען

⁵³נג וינים (וינום) ובית תפוח ואפקה

⁵⁴נד וחמטה וקרית ארבע היא חברון--וציער ערים תשע וחצריהן {ס}

⁵⁵נה מעון כרמל וזיף ויוטה

⁵⁶נו ויזרעאל ויקדעם וזנוח

⁵⁷נז הקין גבעה ותמנה ערים עשר וחצריהן {ס}

⁵⁸נח חלחול בית צור וגדור

⁵⁹נט ומערת ובית ענות ואלתקן ערים שש וחצריהן {פ}

⁶⁰ס קרית בעל היא קרית יערים--והרבה ערים שתים וחצריהן {ס}

⁶¹סא במדבר--בית הערבה מדין וסככה

⁶²סב והנבשן ועיר המלח ועין גדי ערים שש וחצריהן

⁶³סג ואת היבוסי יושבי ירושלם לא יוכלו (יכלו) בני יהודה להורישם וישב היבוסי את בני יהודה בירושלם עד היום הזה {פ}