Read כֶּתֶר אֲרָם צוֹבָא - Tanah Aleppo Codex יהושע 21 Bible Online

יהושע 21 - כֶּתֶר אֲרָם צוֹבָא - Tanah Aleppo Codex bible

יהושע 21

¹א ויגשו ראשי אבות הלוים אל אלעזר הכהן ואל יהושע בן נון ואל ראשי אבות המטות לבני ישראל

²ב וידברו אליהם בשלה בארץ כנען לאמר יהוה צוה ביד משה לתת לנו ערים לשבת ומגרשיהן לבהמתנו {פ}

³ג ויתנו בני ישראל ללוים מנחלתם אל פי יהוה את הערים האלה ואת מגרשיהן

⁴ד ויצא הגורל למשפחת הקהתי ויהי לבני אהרן הכהן מן הלוים ממטה יהודה וממטה השמעני וממטה בנימן בגורל--ערים שלש עשרה {ס}

⁵ה ולבני קהת הנותרים ממשפחת מטה אפרים וממטה דן ומחצי מטה מנשה בגורל--ערים עשר {ס}

⁶ו ולבני גרשון ממשפחות מטה יששכר וממטה אשר וממטה נפתלי ומחצי מטה מנשה בבשן בגורל--ערים שלש עשרה {ס}

⁷ז לבני מררי למשפחתם ממטה ראובן וממטה גד וממטה זבולן--ערים שתים עשרה {ס}

⁸ח ויתנו בני ישראל ללוים את הערים האלה ואת מגרשיהן כאשר צוה יהוה ביד משה בגורל {פ}

⁹ט ויתנו ממטה בני יהודה וממטה בני שמעון--את הערים האלה אשר יקרא אתהן בשם

¹⁰י ויהי לבני אהרן ממשפחות הקהתי מבני לוי כי להם היה הגורל ראישנה

¹¹יא ויתנו להם את קרית ארבע אבי הענוק היא חברון--בהר יהודה ואת מגרשה סביבתיה

¹²יב ואת שדה העיר ואת חצריה נתנו לכלב בן יפנה באחזתו {ס}

¹³יג ולבני אהרן הכהן נתנו את עיר מקלט הרצח--את חברון ואת מגרשה ואת לבנה ואת מגרשה

¹⁴יד ואת יתר ואת מגרשה ואת אשתמע ואת מגרשה

¹⁵טו ואת חלן ואת מגרשה ואת דבר ואת מגרשה

¹⁶טז ואת עין ואת מגרשה ואת יטה ואת מגרשה את בית שמש ואת מגרשה ערים תשע--מאת שני השבטים האלה {ס}

¹⁷יז וממטה בנימין את גבעון ואת מגרשה את גבע ואת מגרשה

¹⁸יח את ענתות ואת מגרשה ואת עלמון ואת מגרשה ערים ארבע

¹⁹יט כל ערי בני אהרן הכהנים--שלש עשרה ערים ומגרשיהן {ס}

²⁰כ ולמשפחות בני קהת הלוים הנותרים מבני קהת ויהי ערי גורלם ממטה אפרים

²¹כא ויתנו להם את עיר מקלט הרצח את שכם ואת מגרשה--בהר אפרים ואת גזר ואת מגרשה

²²כב ואת קבצים ואת מגרשה ואת בית חורן ואת מגרשה ערים ארבע {ס}

²³כג וממטה דן--את אלתקא ואת מגרשה את גבתון ואת מגרשה

²⁴כד את אילון ואת מגרשה את גת רמון ואת מגרשה ערים ארבע

²⁵כה וממחצית מטה מנשה--את תענך ואת מגרשה ואת גת רמון ואת מגרשה ערים שתים

²⁶כו כל ערים עשר ומגרשיהן למשפחות בני קהת הנותרים {ס}

²⁷כז ולבני גרשון ממשפחת הלוים--מחצי מטה מנשה את עיר מקלט הרצח את גלון (גולן) בבשן ואת מגרשה ואת בעשתרה ואת מגרשה ערים שתים {ס}

²⁸כח וממטה יששכר את קשיון ואת מגרשה את דברת ואת מגרשה

²⁹כט את ירמות ואת מגרשה את עין גנים ואת מגרשה ערים ארבע {ס}

³⁰ל וממטה אשר את משאל ואת מגרשה את עבדון ואת מגרשה

³¹לא את חלקת ואת מגרשה ואת רחב ואת מגרשה ערים ארבע {ס}

³²לב וממטה נפתלי את עיר מקלט הרצח את קדש בגליל ואת מגרשה ואת חמת דאר ואת מגרשה ואת קרתן ואת מגרשה ערים שלש

³³לג כל ערי הגרשני למשפחתם--שלש עשרה עיר ומגרשיהן {ס}

³⁴לד ולמשפחות בני מררי הלוים הנותרים--מאת מטה זבולן את יקנעם ואת מגרשה את קרתה ואת מגרשה

³⁵לה את דמנה ואת מגרשה את נהלל ואת מגרשה ערים ארבע {ס}

³⁶לו וממטה גד את עיר מקלט הרצח את רמת בגלעד ואת מגרשה ואת מחנים ואת מגרשה

³⁷לז את חשבון ואת מגרשה את יעזר ואת מגרשה כל ערים ארבע

³⁸לח כל הערים לבני מררי למשפחתם הנותרים ממשפחות הלוים ויהי גורלם--ערים שתים עשרה

³⁹לט כל ערי הלוים בתוך אחזת בני ישראל--ערים ארבעים ושמנה ומגרשיהן

⁴⁰מ תהיינה הערים האלה--עיר עיר ומגרשיה סביבתיה כן לכל הערים האלה {ס}

⁴¹מא ויתן יהוה לישראל את כל הארץ אשר נשבע לתת לאבותם וירשוה וישבו בה

⁴²מב וינח יהוה להם מסביב ככל אשר נשבע לאבותם ולא עמד איש בפניהם מכל איביהם--את כל איביהם נתן יהוה בידם

⁴³מג לא נפל דבר--מכל הדבר הטוב אשר דבר יהוה אל בית ישראל הכל בא {פ}