Read כֶּתֶר אֲרָם צוֹבָא - Tanah Aleppo Codex שופטים 12 Bible Online

שופטים 12 - כֶּתֶר אֲרָם צוֹבָא - Tanah Aleppo Codex bible

שופטים 12

¹א ויצעק איש אפרים ויעבר צפונה ויאמרו ליפתח מדוע עברת להלחם בבני עמון ולנו לא קראת ללכת עמך--ביתך נשרף עליך באש

²ב ויאמר יפתח אליהם איש ריב הייתי אני ועמי ובני עמון מאד ואזעק אתכם ולא הושעתם אותי מידם

³ג ואראה כי אינך מושיע ואשימה נפשי בכפי ואעברה אל בני עמון ויתנם יהוה בידי ולמה עליתם אלי היום הזה--להלחם בי

⁴ד ויקבץ יפתח את כל אנשי גלעד וילחם את אפרים ויכו אנשי גלעד את אפרים כי אמרו פליטי אפרים אתם--גלעד בתוך אפרים בתוך מנשה

⁵ה וילכד גלעד את מעברות הירדן לאפרים והיה כי יאמרו פליטי אפרים אעברה ויאמרו לו אנשי גלעד האפרתי אתה ויאמר לא

⁶ו ויאמרו לו אמר נא שבלת ויאמר סבלת ולא יכין לדבר כן ויאחזו אותו וישחטוהו אל מעברות הירדן ויפל בעת ההיא מאפרים ארבעים ושנים אלף

⁷ז וישפט יפתח את ישראל שש שנים וימת יפתח הגלעדי ויקבר בערי גלעד {פ}

⁸ח וישפט אחריו את ישראל אבצן מבית לחם

⁹ט ויהי לו שלשים בנים ושלשים בנות שלח החוצה ושלשים בנות הביא לבניו מן החוץ וישפט את ישראל שבע שנים

¹⁰י וימת אבצן ויקבר בבית לחם {פ}

¹¹יא וישפט אחריו את ישראל אילון הזבולני וישפט את ישראל עשר שנים

¹²יב וימת אילון הזבולני ויקבר באילון בארץ זבולן {פ}

¹³יג וישפט אחריו את ישראל עבדון בן הלל הפרעתוני

¹⁴יד ויהי לו ארבעים בנים ושלשים בני בנים רכבים על שבעים עירם וישפט את ישראל שמנה שנים

¹⁵טו וימת עבדון בן הלל הפרעתוני ויקבר בפרעתון בארץ אפרים בהר העמלקי {פ}