Read כֶּתֶר אֲרָם צוֹבָא - Tanah Aleppo Codex שופטים 17 Bible Online

שופטים 17 - כֶּתֶר אֲרָם צוֹבָא - Tanah Aleppo Codex bible

שופטים 17

¹א ויהי איש מהר אפרים ושמו מיכיהו

²ב ויאמר לאמו אלף ומאה הכסף אשר לקח לך ואתי (ואת) אלית וגם אמרת באזני הנה הכסף אתי אני לקחתיו ותאמר אמו ברוך בני ליהוה

³ג וישב את אלף ומאה הכסף לאמו ותאמר אמו הקדש הקדשתי את הכסף ליהוה מידי לבני לעשות פסל ומסכה ועתה אשיבנו לך

⁴ד וישב את הכסף לאמו ותקח אמו מאתים כסף ותתנהו לצורף ויעשהו פסל ומסכה ויהי בבית מיכיהו

⁵ה והאיש מיכה לו בית אלהים ויעש אפוד ותרפים וימלא את יד אחד מבניו ויהי לו לכהן

⁶ו בימים ההם אין מלך בישראל איש הישר בעיניו יעשה {פ}

⁷ז ויהי נער מבית לחם יהודה ממשפחת יהודה והוא לוי והוא גר שם

⁸ח וילך האיש מהעיר מבית לחם יהודה לגור באשר ימצא ויבא הר אפרים עד בית מיכה לעשות דרכו

⁹ט ויאמר לו מיכה מאין תבוא ויאמר אליו לוי אנכי מבית לחם יהודה ואנכי הלך לגור באשר אמצא

¹⁰י ויאמר לו מיכה שבה עמדי והיה לי לאב ולכהן ואנכי אתן לך עשרת כסף לימים וערך בגדים ומחיתך וילך הלוי

¹¹יא ויואל הלוי לשבת את האיש ויהי הנער לו כאחד מבניו

¹²יב וימלא מיכה את יד הלוי ויהי לו הנער לכהן ויהי בבית מיכה

¹³יג ויאמר מיכה--עתה ידעתי כי ייטיב יהוה לי כי היה לי הלוי לכהן {פ}