Read כֶּתֶר אֲרָם צוֹבָא - Tanah Aleppo Codex שופטים 2 Bible Online

שופטים 2 - כֶּתֶר אֲרָם צוֹבָא - Tanah Aleppo Codex bible

שופטים 2

¹א ויעל מלאך יהוה מן הגלגל אל הבכים {פ} ויאמר אעלה אתכם ממצרים ואביא אתכם אל הארץ אשר נשבעתי לאבתיכם ואמר לא אפר בריתי אתכם לעולם

²ב ואתם לא תכרתו ברית ליושבי הארץ הזאת--מזבחותיהם תתצון ולא שמעתם בקולי מה זאת עשיתם

³ג וגם אמרתי לא אגרש אותם מפניכם והיו לכם לצדים ואלהיהם יהיו לכם למוקש

⁴ד ויהי כדבר מלאך יהוה את הדברים האלה אל כל בני ישראל וישאו העם את קולם ויבכו

⁵ה ויקראו שם המקום ההוא בכים ויזבחו שם ליהוה {פ}

⁶ו וישלח יהושע את העם וילכו בני ישראל איש לנחלתו לרשת את הארץ

⁷ז ויעבדו העם את יהוה כל ימי יהושע וכל ימי הזקנים אשר האריכו ימים אחרי יהושוע אשר ראו את כל מעשה יהוה הגדול אשר עשה לישראל

⁸ח וימת יהושע בן נון עבד יהוה בן מאה ועשר שנים

⁹ט ויקברו אותו בגבול נחלתו בתמנת חרס בהר אפרים מצפון להר געש

¹⁰י וגם כל הדור ההוא נאספו אל אבותיו ויקם דור אחר אחריהם אשר לא ידעו את יהוה וגם את המעשה אשר עשה לישראל {פ}

¹¹יא ויעשו בני ישראל את הרע בעיני יהוה ויעבדו את הבעלים

¹²יב ויעזבו את יהוה אלהי אבותם המוציא אותם מארץ מצרים וילכו אחרי אלהים אחרים מאלהי העמים אשר סביבותיהם וישתחוו להם ויכעסו את יהוה

¹³יג ויעזבו את יהוה ויעבדו לבעל ולעשתרות

¹⁴יד ויחר אף יהוה בישראל ויתנם ביד שסים וישסו אותם וימכרם ביד אויביהם מסביב ולא יכלו עוד לעמד לפני אויביהם

¹⁵טו בכל אשר יצאו יד יהוה היתה בם לרעה כאשר דבר יהוה וכאשר נשבע יהוה להם ויצר להם מאד

¹⁶טז ויקם יהוה שפטים ויושיעום מיד שסיהם

¹⁷יז וגם אל שפטיהם לא שמעו--כי זנו אחרי אלהים אחרים וישתחוו להם סרו מהר מן הדרך אשר הלכו אבותם לשמע מצות יהוה--לא עשו כן

¹⁸יח וכי הקים יהוה להם שפטים והיה יהוה עם השפט והושיעם מיד איביהם כל ימי השופט כי ינחם יהוה מנאקתם מפני לחציהם ודחקיהם

¹⁹יט והיה במות השופט ישבו והשחיתו מאבותם ללכת אחרי אלהים אחרים לעבדם ולהשתחות להם לא הפילו ממעלליהם ומדרכם הקשה

²⁰כ ויחר אף יהוה בישראל ויאמר יען אשר עברו הגוי הזה את בריתי אשר צויתי את אבותם ולא שמעו לקולי

²¹כא גם אני לא אוסיף להוריש איש מפניהם מן הגוים אשר עזב יהושע וימת

²²כב למען נסות בם את ישראל השמרים הם את דרך יהוה ללכת בם כאשר שמרו אבותם--אם לא

²³כג וינח יהוה את הגוים האלה לבלתי הורישם מהר ולא נתנם ביד יהושע {פ}