Read כֶּתֶר אֲרָם צוֹבָא - Tanah Aleppo Codex שופטים 21 Bible Online

שופטים 21 - כֶּתֶר אֲרָם צוֹבָא - Tanah Aleppo Codex bible

שופטים 21

¹א ואיש ישראל נשבע במצפה לאמר איש ממנו לא יתן בתו לבנימן לאשה

²ב ויבא העם בית אל וישבו שם עד הערב לפני האלהים וישאו קולם ויבכו בכי גדול

³ג ויאמרו--למה יהוה אלהי ישראל היתה זאת בישראל להפקד היום מישראל שבט אחד

⁴ד ויהי ממחרת וישכימו העם ויבנו שם מזבח ויעלו עלות ושלמים {פ}

⁵ה ויאמרו בני ישראל מי אשר לא עלה בקהל מכל שבטי ישראל אל יהוה כי השבועה הגדולה היתה לאשר לא עלה אל יהוה המצפה לאמר--מות יומת

⁶ו וינחמו בני ישראל אל בנימן אחיו ויאמרו נגדע היום שבט אחד מישראל

⁷ז מה נעשה להם לנותרים לנשים ואנחנו נשבענו ביהוה לבלתי תת להם מבנותינו לנשים

⁸ח ויאמרו--מי אחד משבטי ישראל אשר לא עלה אל יהוה המצפה והנה לא בא איש אל המחנה מיביש גלעד--אל הקהל

⁹ט ויתפקד העם והנה אין שם איש מיושבי יבש גלעד

¹⁰י וישלחו שם העדה שנים עשר אלף איש--מבני החיל ויצוו אותם לאמר לכו והכיתם את יושבי יבש גלעד לפי חרב והנשים והטף

¹¹יא וזה הדבר אשר תעשו כל זכר וכל אשה ידעת משכב זכר--תחרימו

¹²יב וימצאו מיושבי יביש גלעד ארבע מאות נערה בתולה אשר לא ידעה איש למשכב זכר ויבאו אותם אל המחנה שלה אשר בארץ כנען {פ}

¹³יג וישלחו כל העדה וידברו אל בני בנימן אשר בסלע רמון ויקראו להם שלום

¹⁴יד וישב בנימן בעת ההיא ויתנו להם הנשים אשר חיו מנשי יבש גלעד ולא מצאו להם כן

¹⁵טו והעם נחם לבנימן כי עשה יהוה פרץ בשבטי ישראל

¹⁶טז ויאמרו זקני העדה מה נעשה לנותרים לנשים כי נשמדה מבנימן אשה

¹⁷יז ויאמרו ירשת פליטה לבנימן ולא ימחה שבט מישראל

¹⁸יח ואנחנו לא נוכל לתת להם נשים--מבנותינו כי נשבעו בני ישראל לאמר ארור נתן אשה לבנימן {ס}

¹⁹יט ויאמרו הנה חג יהוה בשלו מימים ימימה אשר מצפונה לבית אל מזרחה השמש למסלה העלה מבית אל שכמה--ומנגב ללבונה

²⁰כ ויצו (ויצוו) את בני בנימן לאמר לכו וארבתם בכרמים

²¹כא וראיתם והנה אם יצאו בנות שילו לחול במחלות ויצאתם מן הכרמים וחטפתם לכם איש אשתו מבנות שילו והלכתם ארץ בנימן

²²כב והיה כי יבאו אבותם או אחיהם לרוב (לריב) אלינו ואמרנו אליהם חנונו אותם--כי לא לקחנו איש אשתו במלחמה כי לא אתם נתתם להם כעת תאשמו {ס}

²³כג ויעשו כן בני בנימן וישאו נשים למספרם מן המחללות אשר גזלו וילכו וישובו אל נחלתם ויבנו את הערים וישבו בהם

²⁴כד ויתהלכו משם בני ישראל בעת ההיא איש לשבטו ולמשפחתו ויצאו משם איש לנחלתו {פ}

²⁵כה בימים ההם אין מלך בישראל איש הישר בעיניו יעשה {ש}