Read כֶּתֶר אֲרָם צוֹבָא - Tanah Aleppo Codex רות 1 Bible Online

רות 1 - כֶּתֶר אֲרָם צוֹבָא - Tanah Aleppo Codex bible

רות 1

¹א ויהי בימי שפט השפטים ויהי רעב בארץ וילך איש מבית לחם יהודה לגור בשדי מואב--הוא ואשתו ושני בניו

²ב ושם האיש אלימלך ושם אשתו נעמי ושם שני בניו מחלון וכליון אפרתים--מבית לחם יהודה ויבאו שדי מואב ויהיו שם

³ג וימת אלימלך איש נעמי ותשאר היא ושני בניה

⁴ד וישאו להם נשים מאביות--שם האחת ערפה ושם השנית רות וישבו שם כעשר שנים

⁵ה וימתו גם שניהם מחלון וכליון ותשאר האשה משני ילדיה ומאישה

⁶ו ותקם היא וכלתיה ותשב משדי מואב כי שמעה בשדה מואב--כי פקד יהוה את עמו לתת להם לחם

⁷ז ותצא מן המקום אשר היתה שמה ושתי כלותיה עמה ותלכנה בדרך לשוב אל ארץ יהודה

⁸ח ותאמר נעמי לשתי כלתיה לכנה שבנה אשה לבית אמה יעשה (יעש) יהוה עמכם חסד כאשר עשיתם עם המתים ועמדי

⁹ט יתן יהוה לכם ומצאן מנוחה אשה בית אישה ותשק להן ותשאנה קולן ותבכינה

¹⁰י ותאמרנה לה כי אתך נשוב לעמך

¹¹יא ותאמר נעמי שבנה בנתי למה תלכנה עמי העוד לי בנים במעי והיו לכם לאנשים

¹²יב שבנה בנתי לכן כי זקנתי מהיות לאיש כי אמרתי יש לי תקוה--גם הייתי הלילה לאיש וגם ילדתי בנים

¹³יג הלהן תשברנה עד אשר יגדלו הלהן תעגנה לבלתי היות לאיש אל בנתי כי מר לי מאד מכם--כי יצאה בי יד יהוה

¹⁴יד ותשנה קולן ותבכינה עוד ותשק ערפה לחמותה ורות דבקה בה

¹⁵טו ותאמר הנה שבה יבמתך אל עמה ואל אלהיה שובי אחרי יבמתך

¹⁶טז ותאמר רות אל תפגעי בי לעזבך לשוב מאחריך כי אל אשר תלכי אלך ובאשר תליני אלין--עמך עמי ואלהיך אלהי

¹⁷יז באשר תמותי אמות ושם אקבר כה יעשה יהוה לי וכה יוסיף--כי המות יפריד ביני ובינך

¹⁸יח ותרא כי מתאמצת היא ללכת אתה ותחדל לדבר אליה

¹⁹יט ותלכנה שתיהם עד בואנה בית לחם ויהי כבואנה בית לחם ותהם כל העיר עליהן ותאמרנה הזאת נעמי

²⁰כ ותאמר אליהן אל תקראנה לי נעמי קראן לי מרא כי המר שדי לי מאד

²¹כא אני מלאה הלכתי וריקם השיבני יהוה למה תקראנה לי נעמי ויהוה ענה בי ושדי הרע לי

²²כב ותשב נעמי ורות המואביה כלתה עמה השבה משדי מואב והמה באו בית לחם בתחלת קציר שערים