Read כֶּתֶר אֲרָם צוֹבָא - Tanah Aleppo Codex רות 3 Bible Online

רות 3 - כֶּתֶר אֲרָם צוֹבָא - Tanah Aleppo Codex bible

רות 3

¹א ותאמר לה נעמי חמותה בתי הלא אבקש לך מנוח אשר ייטב לך

²ב ועתה הלא בעז מדעתנו אשר היית את נערותיו הנה הוא זרה את גרן השערים--הלילה

³ג ורחצת וסכת ושמת שמלתך (שמלתיך) עליך--וירדתי (וירדת) הגרן אל תודעי לאיש עד כלתו לאכל ולשתות

⁴ד ויהי בשכבו וידעת את המקום אשר ישכב שם ובאת וגלית מרגלתיו ושכבתי (ושכבת) והוא יגיד לך את אשר תעשין

⁵ה ותאמר אליה כל אשר תאמרי (אלי) אעשה

⁶ו ותרד הגרן ותעש ככל אשר צותה חמותה

⁷ז ויאכל בעז וישת וייטב לבו ויבא לשכב בקצה הערמה ותבא בלט ותגל מרגלתיו ותשכב

⁸ח ויהי בחצי הלילה ויחרד האיש וילפת והנה אשה שכבת מרגלתיו

⁹ט ויאמר מי את ותאמר אנכי רות אמתך ופרשת כנפך על אמתך כי גאל אתה

¹⁰י ויאמר ברוכה את ליהוה בתי--היטבת חסדך האחרון מן הראשון לבלתי לכת אחרי הבחורים--אם דל ואם עשיר

¹¹יא ועתה בתי אל תיראי כל אשר תאמרי אעשה לך כי יודע כל שער עמי כי אשת חיל את

¹²יב ועתה כי אמנם כי אם ( ) גאל אנכי וגם יש גאל קרוב ממני

¹³יג ליני הלילה והיה בבקר אם יגאלך טוב יגאל ואם לא יחפץ לגאלך וגאלתיך אנכי חי יהוה שכבי עד הבקר

¹⁴יד ותשכב מרגלותו עד הבקר ותקם בטרום (בטרם) יכיר איש את רעהו ויאמר אל יודע כי באה האשה הגרן

¹⁵טו ויאמר הבי המטפחת אשר עליך ואחזי בה--ותאחז בה וימד שש שערים וישת עליה ויבא העיר

¹⁶טז ותבוא אל חמותה ותאמר מי את בתי ותגד לה--את כל אשר עשה לה האיש

¹⁷יז ותאמר שש השערים האלה נתן לי כי אמר (אלי) אל תבואי ריקם אל חמותך

¹⁸יח ותאמר שבי בתי עד אשר תדעין איך יפל דבר כי לא ישקט האיש כי אם כלה הדבר היום