Read כֶּתֶר אֲרָם צוֹבָא - Tanah Aleppo Codex שמואל א 18 Bible Online

שמואל א 18 - כֶּתֶר אֲרָם צוֹבָא - Tanah Aleppo Codex bible

שמואל א 18

¹א ויהי ככלתו לדבר אל שאול ונפש יהונתן נקשרה בנפש דוד ויאהבו (ויאהבהו) יהונתן כנפשו

²ב ויקחהו שאול ביום ההוא ולא נתנו לשוב בית אביו

³ג ויכרת יהונתן ודוד ברית באהבתו אתו כנפשו

⁴ד ויתפשט יהונתן את המעיל אשר עליו ויתנהו לדוד ומדיו ועד חרבו ועד קשתו ועד חגרו

⁵ה ויצא דוד בכל אשר ישלחנו שאול ישכיל וישמהו שאול על אנשי המלחמה וייטב בעיני כל העם וגם בעיני עבדי שאול {פ}

⁶ו ויהי בבואם בשוב דוד מהכות את הפלשתי ותצאנה הנשים מכל ערי ישראל לשור (לשיר) והמחלות לקראת שאול המלך--בתפים בשמחה ובשלשים

⁷ז ותענינה הנשים המשחקות ותאמרן הכה שאול באלפו ודוד ברבבתיו

⁸ח ויחר לשאול מאד וירע בעיניו הדבר הזה ויאמר נתנו לדוד רבבות ולי נתנו האלפים ועוד לו אך המלוכה

⁹ט ויהי שאול עון (עוין) את דוד מהיום ההוא והלאה {ס}

¹⁰י ויהי ממחרת ותצלח רוח אלהים רעה אל שאול ויתנבא בתוך הבית ודוד מנגן בידו כיום ביום והחנית ביד שאול

¹¹יא ויטל שאול את החנית ויאמר אכה בדוד ובקיר ויסב דוד מפניו פעמים

¹²יב וירא שאול מלפני דוד כי היה יהוה עמו ומעם שאול סר

¹³יג ויסרהו שאול מעמו וישמהו לו שר אלף ויצא ויבא לפני העם {ס}

¹⁴יד ויהי דוד לכל דרכו משכיל ויהוה עמו

¹⁵טו וירא שאול אשר הוא משכיל מאד ויגר מפניו

¹⁶טז וכל ישראל ויהודה אהב את דוד כי הוא יוצא ובא לפניהם {פ}

¹⁷יז ויאמר שאול אל דוד הנה בתי הגדולה מרב אתה אתן לך לאשה--אך היה לי לבן חיל והלחם מלחמות יהוה ושאול אמר אל תהי ידי בו ותהי בו יד פלשתים {ס}

¹⁸יח ויאמר דוד אל שאול מי אנכי ומי חיי משפחת אבי בישראל--כי אהיה חתן למלך

¹⁹יט ויהי בעת תת את מרב בת שאול--לדוד והיא נתנה לעדריאל המחלתי לאשה

²⁰כ ותאהב מיכל בת שאול את דוד ויגדו לשאול וישר הדבר בעיניו

²¹כא ויאמר שאול אתננה לו ותהי לו למוקש ותהי בו יד פלשתים ויאמר שאול אל דוד בשתים תתחתן בי היום

²²כב ויצו שאול את עבדו דברו אל דוד בלט לאמר הנה חפץ בך המלך וכל עבדיו אהבוך ועתה התחתן במלך

²³כג וידברו עבדי שאול באזני דוד את הדברים האלה ויאמר דוד הנקלה בעיניכם התחתן במלך ואנכי איש רש ונקלה

²⁴כד ויגדו עבדי שאול לו--לאמר כדברים האלה דבר דוד

²⁵כה ויאמר שאול כה תאמרו לדוד אין חפץ למלך במהר כי במאה ערלות פלשתים להנקם באיבי המלך ושאול חשב להפיל את דוד ביד פלשתים

²⁶כו ויגדו עבדיו לדוד את הדברים האלה וישר הדבר בעיני דוד להתחתן במלך ולא מלאו הימים

²⁷כז ויקם דוד וילך הוא ואנשיו ויך בפלשתים מאתים איש ויבא דוד את ערלתיהם וימלאום למלך להתחתן במלך ויתן לו שאול את מיכל בתו לאשה {ס}

²⁸כח וירא שאול וידע כי יהוה עם דוד ומיכל בת שאול אהבתהו

²⁹כט ויאסף שאול לרא מפני דוד--עוד ויהי שאול איב את דוד כל הימים {פ}

³⁰ל ויצאו שרי פלשתים ויהי מדי צאתם שכל דוד מכל עבדי שאול וייקר שמו מאד {ס}