Read כֶּתֶר אֲרָם צוֹבָא - Tanah Aleppo Codex שמואל א 8 Bible Online

שמואל א 8 - כֶּתֶר אֲרָם צוֹבָא - Tanah Aleppo Codex bible

שמואל א 8

¹א ויהי כאשר זקן שמואל וישם את בניו שפטים לישראל

²ב ויהי שם בנו הבכור יואל ושם משנהו אביה--שפטים בבאר שבע

³ג ולא הלכו בניו בדרכו ויטו אחרי הבצע ויקחו שחד--ויטו משפט {פ}

⁴ד ויתקבצו כל זקני ישראל ויבאו אל שמואל הרמתה

⁵ה ויאמרו אליו הנה אתה זקנת ובניך לא הלכו בדרכיך עתה שימה לנו מלך לשפטנו--ככל הגוים

⁶ו וירע הדבר בעיני שמואל כאשר אמרו תנה לנו מלך לשפטנו ויתפלל שמואל אל יהוה {פ}

⁷ז ויאמר יהוה אל שמואל שמע בקול העם לכל אשר יאמרו אליך כי לא אתך מאסו כי אתי מאסו ממלך עליהם

⁸ח ככל המעשים אשר עשו מיום העלתי אותם ממצרים ועד היום הזה ויעזבני ויעבדו אלהים אחרים--כן המה עשים גם לך

⁹ט ועתה שמע בקולם אך כי העד תעיד בהם והגדת להם משפט המלך אשר ימלך עליהם {ס}

¹⁰י ויאמר שמואל את כל דברי יהוה אל העם השאלים מאתו מלך {ס}

¹¹יא ויאמר--זה יהיה משפט המלך אשר ימלך עליכם את בניכם יקח ושם לו במרכבתו ובפרשיו ורצו לפני מרכבתו

¹²יב ולשום לו שרי אלפים ושרי חמשים ולחרש חרישו ולקצר קצירו ולעשות כלי מלחמתו וכלי רכבו

¹³יג ואת בנותיכם יקח לרקחות ולטבחות ולאפות

¹⁴יד ואת שדותיכם ואת כרמיכם וזיתיכם הטובים--יקח ונתן לעבדיו

¹⁵טו וזרעיכם וכרמיכם יעשר ונתן לסריסיו ולעבדיו

¹⁶טז ואת עבדיכם ואת שפחותיכם ואת בחוריכם הטובים ואת חמוריכם--יקח ועשה למלאכתו

¹⁷יז צאנכם יעשר ואתם תהיו לו לעבדים

¹⁸יח וזעקתם ביום ההוא מלפני מלככם אשר בחרתם לכם ולא יענה יהוה אתכם ביום ההוא

¹⁹יט וימאנו העם לשמע בקול שמואל ויאמרו לא כי אם מלך יהיה עלינו

²⁰כ והיינו גם אנחנו ככל הגוים ושפטנו מלכנו ויצא לפנינו ונלחם את מלחמתנו

²¹כא וישמע שמואל את כל דברי העם וידברם באזני יהוה {פ}

²²כב ויאמר יהוה אל שמואל שמע בקולם והמלכת להם מלך ויאמר שמואל אל אנשי ישראל לכו איש לעירו {פ}