Read Tangkhul Naga HAOKAPHOK 1 Bible Online

HAOKAPHOK 1 - Tangkhul Naga bible

HAOKAPHOK 1

¹ Haokaphokli Varena kazing eina ngalei sai.

²Okathui hi amei-amā maleisāmana, kala kathuka chiwui ari arāp tangmangting eina leisai; kala Varewui Manglā china tara̱tungli zatung-zatvā sai.

³ Kala Varena hānga, “Kahor leiranu”; chieina kahor leihaowa.

⁴Kala kahor chi phāhaira da Varena thei; kala Varena kahor chi tangkhamangwui eina ngatei ngasaka.

⁵Varena kahor chili Ngashun, kala tangkhamang chili Ngayā da hoi. Chithang ngazin eina ngathor chi kharethangna.

⁶ Kala Varena hānga, “Tara̱ ngachaiwui eina khamasai shokranu, kala china tara̱ akhawui eina tara̱ akhali ngatei ngasakranu.”

⁷Kala Varena khamasaiwui azingli khalei tara̱ eina khamasaiwui atungli khalei tara̱ chi ngatei ngasaka. Kala chi tākam eina shoka.

⁸Varena khamasai chili Kazingram hoi. Chithang ngazin eina ngathor chi kakhanethangna.

⁹Kala Varena hānga, “Kazingli khalei tara̱ chi apam akhali kazipkha sāhaida ngalei katheng leiranu.” Kala chi tākam eina shoka.

¹⁰Katheng chili Varena Ngalei hoi, kala tara̱ kazipkha sākahai chili Shamadru hoi. Kala chi phāhaira da Varena thei.

¹¹Kala Varena, “Ngaleina akhār khārda thingnā-ra̱hā, athā kazang arongyurbing, kala atheirong yurna kachichāwui ayur athishurda athā kazanga athei matheiranu” da hānga. Kala chi tākam eina shoka.

¹²Ngaleili thingnā-ra̱hā kachungkha shoka, arong ayur ngatateida athā zangsera, kala thingrongbingna athei matheida ayur ayurwui athishurda athā zangsera. Kala chi Varena phāhaira da thei.

¹³Chithang ngazin eina ngathor chi kakathumathangna.

¹⁴Varena hānga, “Ngashun eina ngayā ngatei khavai kazingwui khamasaili kahorbing leiranu, kala china atam, zimiksho kala zingkum theikhui khavai sāranu,

¹⁵kala okathuili horkhavai kazingramwui khamasaili kahor leiranu.” Kala chi tākam eina shoka.

¹⁶Varena kahor kahakva̱ khani sai, hakkhamei kahor china ngashun mungkhavai, teokhamei kahor china ngayā mungkhavai; kala ana sirā kachungkhala sākhui.

¹⁷Kala okathuili horkhavai saikora chi kazingramwui khamasaili Varena haimi,

¹⁸china ngashun eina ngayā mungkhavai, kala kahor eina tangkhamang ngatei ngasak khavaina. Kala chi Varena phāhaira da thei.

¹⁹Chithang ngazin eina ngathor chi khamatethangna.

²⁰Kala Varena hānga, “Tara̱wui eina manglākapai kachungkha shokranu, kala okathuili vānaobingna kazingramwui khamasaili yongzatranu.”

²¹Chithāda sāda Varena shamadrulungli hakkhamahā sāyur kala tara̱lungli ngarikazata kharingyur kachiva̱, kala angachāng kakā vānaoyur kachiva̱ sākhui. Kala chi Varena phāhaira da thei.

²²Kala Varena athumli somida hānga, “Athei matheilu kala mataisanglu kala shamadruwui tara̱lungli chipemlu, kala okathuili vānao mayāsangranu.”

²³Chithang ngazin eina ngathor chi kaphangā thangna.

²⁴Varena hānga, “Ngaleiwui eina manglākapaiyur kachiva̱: sha̱kei, ngarikazata yur, kala sāyur shokranu.” Kala chi tākam eina shoka.

²⁵Kala Varena sāyur ayāyāva̱, sha̱kei ayur ngatateida kala ngaleili ngarikazata ayur ngatateida shokngasaka. Kala chi phāhaira da Varena thei.

²⁶ Chiwui thili Varena hānga, “Ithumwui sakrin khuida ithumli ngaraikachā mi sākhuisa; kala shamadruli khalei khaihyur, kazingli yongkazata vānao, sha̱kei kala okathuiwui ngaleitungli ngarikazata saikorawuitungli athumna mungranu.”

²⁷Chithāda Varena awui sakrin khuida mi sākhui, Varewui sakrin khuida mayarnao sākhui; mayarnao eina sha̱nao chi sākhui.

²⁸Kala Varena anili somida hānga, “Athei matheilu kala mayāsanglu, okathui chipemlu kala khamunga sālu; shamadruwui khaih, kazingwui vānao, kala ngaleitungli ngawokazat manglākapai kachiva̱wuitungli munglu.”

²⁹Varena hānga, “Yanglu, okathui apam huptali khalei athā kapanga akhar katonga, kala atheili athā kazanga atheirong kachiva̱ ina khamina; naniwui vang kashakazā ngasāra.

³⁰Kala okathuili khalei sāyur saikora, kazingwui vānaoyur saikora kala ngaleitungli ngarikazata, kala khaksuida kharinga yur kachiva̱li, khamateka thingnā-ra̱hā kachiva̱ kashakazā sākhavai ina mihaira.” Kala chi tākam eina shoka.

³¹Kala Varena sākahai saikora chi yanglaga phālakhaira da ana thei. Chithang ngazin eina ngathor chi katharuka thangna.