Read Tangkhul Naga HAOKAPHOK 11 Bible Online

HAOKAPHOK 11 - Tangkhul Naga bible

HAOKAPHOK 11

¹Chitharān okathui katonga tuiyur akhamāngsai, tuikhurla machungmana.

²Kala zimikshoshong athumna khavā tharan Shinar ngaleili tampāk akha leisāda chili asoma.

³Kala athum akha eina akha ngazek ngarokta hānga, “Ralu, ithum chek semlaga rikkazakkhuisa.” Chithāda sāda ngalungwui vang chek kala nāpkhavaiwui vang khe shichina.

⁴Chiwui thili athumna hānga, “Raserlu, ithum keinung akha sākhuisa, kala dolanshim kajuiva̱ akhala aton kazingramli kazokta sākhuisa, kaja ithumwui ming zatkhavai sāsa, chi maningakha ithum okathui apam katongali chaiyānghaora.”

⁵PROHOna mibingwui naomayarabingna sākahai keinung eina dolanshim chi yangkhavai tai.

⁶Kala PROHOna hānga, “Yanglu, athum yur akhamānga kala tuila akhamānga; athumna sāki kaji chi hina haokaphokna, athumna sāra kaji masākharar maleisāmara.

⁷Ralu, ithumna tālaga athumwui tui pa̱ngapāmihaosa; akhana akhawui tui mashaaranu.”

⁸Chithāda sāda PROHOna athumli apam chiwui eina okathui apam kachida chaiyāng ngasakhaowa, chieina athumna keinung chi masāluithuwa.

⁹Chiwui vang eina apam chiwui aming Babel hoi, kaja apam chili PROHOna okathui katongawui tui pa̱ngapāmihaowa, kala chiwui eina PROHOna athumli okathui peida chaiyāng ngasakhaowa.

¹⁰Hi Shemwui naotunbingna. Ana kum shākha kākashung eina Arpachshadli pharai, hi tara̱ phongda kum khaniwui thilina;

¹¹Shemna Arpakshadli pharā kahaiwui thili kum shāphangā ringvāda sha̱nao mayarnao khangateila pharai.

¹²Arpachshadna kum thumrāda phangā kākashung eina Shelahli pharai;

¹³Arpachshadna Shelahli pharā kahaiwui thili kum shāmati apā kathum ringvāda sha̱nao mayarnao khangateila pharai.

¹⁴Shelahna kum thumrā kākashung eina Eberli pharai;

¹⁵Shelahna Eberli pharākakhuiwui thili kum shāmati apā kathum ringvāda mayarnao sha̱nao khangateila pharai.

¹⁶Eberna kum thumrāda mati kākashung eina Pelegli pharai;

¹⁷kala Eberna Pelegli kapharāwui thili kum shāmati thumra ringvāda khangatei mayarnao sha̱nao khangateila pharai.

¹⁸Pelegna kum thumrā kākashung eina Reuli pharai;

¹⁹Pelegna Reuli pharā kahaiwui thili kum shākhani apā chiko ringvāda mayarnao sha̱nao khangateila pharai.

²⁰Reuna kum thumrāda khani kākashung eina Serugli pharai;

²¹Reuna Serugli pharā kahaiwui thili kum shākhani apā shini ringvāda mayarnao sha̱nao khangateila pharai.

²²Serugna kum thumrā kākashung eina Nahorli pharai;

²³Serugna Nahorli pharā kahaiwui thili kum shākhani ringvālaga mayarnao sha̱nao khangateila pharai.

²⁴Nahorna kum maga̱da chiko kākashung eina Terahli pharai;

²⁵Nahorna Terahli pharā kahaiwui thili kum shākha tharāda chiko ringvāda mayarnao sha̱nao khangateila pharai.

²⁶Terahna kum hangshini kākashung eina Abram, Nahor kala Haranli pharai.

²⁷Hibing hi Terahwui naotunbingna. Terahna Abram, Nahor kala Haranli pharai; Haranna Lotli pharai;

²⁸Chaldea ngaleiwui Ur kaho kha̱, ali pharā khavaipamli avāva̱ Terah mathiranglakha Haran thihaowa.

²⁹Kala Abram eina Nahorla ngalā khui; Abram preiva̱li Sarai, kala Nahor preiva̱li Milcah hoi; Milcah eina Iscahli Haranna pharai.

³⁰Kala Sarai naoshuma; nao maleimana.

³¹Terahna anaomayara Abram, Haranwui naomayara, awui ara̱ Lot, kala anaomayara Abramwui preiva̱ arihāva̱ Saraili ngasoda Chaldeawui ngalei Urwui eina Canaanli vākhavai zata, kha athumna Haranli vākashung chitharān chili asomhaowa.

³²Terahna kum shākhani apā phangā kākashung eina Haranli thihaowa.