Read Tangkhul Naga HAOKAPHOK 13 Bible Online

HAOKAPHOK 13 - Tangkhul Naga bible

HAOKAPHOK 13

¹Chieina Abramna apreiva̱, kala awui khalalei saikora, kala Lot zangda Egyptwui eina Negebshong latshanga.

²Abram sha̱keila, lupāsāla, sinala shānglak eina leisai.

³Negebwui eina zatlaga Bethel eina Aiwui ngachaili khare kachāng shimnao sakahaipam Bethel mashangshungranglakha eina tangda zatlaga apam chili shangkashung eina,

⁴ana khareli hanphut sahaikasā apam chili Abramna PROHOwui mingli khoruma.

⁵Kala Abramli ngasokazata Lotla awui yao eina sha̱kei kala kachonshim leisai,

⁶chieina ani pamkharum hi ngalei chiwui eina samkaphang china mashapthuwa; kaja aniwui sha̱kei, lan chungnāhaida mangasopampaithuwa,

⁷kala Abram eina Lotwui sei kahombing kharar ngarokhaowa. Atam chitharān ngalei chili Canaannaobing eina Periznaobing pamsai.

⁸Chieina Abramna Lotli hānga, “Iniwui ngachaili kala iniwui sei kahomnaowui ngachaili makharar ngarokaranu, kaja ini shimkhur akhana.

⁹Lam katonga hi nawui mangāli khalei maningmala? Iwui eina na ngateithuiulu. Nana uishong khuiga jiakha ina yāshong vāra; nana yāshong khuiga jiakha ina uishong vāra.”

¹⁰Chieina Lotna ngashānyanglaga Jordan tampāk chi PROHOwui yāmgui thāda Zoarwuishong khalei Egypt ngalei tākam eina apam kachiva̱li tara̱ mathālak eina khalei chi thei. Hi PROHOna Sodom eina Gomorrah mashimān ngasakranglakhawui atamna.

¹¹Chieina Lotna Jordan tampāk saikora kapangkhuiya, kala Lotna zingshoshong vāhaowa; chithāda sāda ani ngapākhaowa.

¹²Abramna Canaanli soma, kala Lotna tampākwui keinung ngachaili pamda Sodom vāshungda awui kachonshim khaningkai.

¹³Chitharān Sodomwui mibing hi makaphā makhayā PROHOwui mangāli morei phungmatailak kahaibing ngasāsai.

¹⁴Lotna pākthui kahaiwui thili PROHOna Abramli hānga, “Nana pamda khalei chiwui eina atungshongla, azingshongla, zingsho kala zingtun kapeiyanglu;

¹⁵ kaja nana kathei ram saikora hi ina nali kala nawui naotunbingli katang mavaila mira.

¹⁶Nawui ara̱-azā okathuiwui chifayākha ngasā ngasakra; chieina mina chifa shānkhuishapakha nawui ara̱-azāla shānkhuishapra.

¹⁷Ngakarthuida ngalei chiwui asān-aret peida zatlu, ina hi nali mira.”

¹⁸Chieina Abramna awui kachonshim khuiphungda zatlaga Hebronli khalei Mamrewui shirimthing ngalemli asoma; kala chili ana PROHO wui vang hanphut akha sai.