Read Tangkhul Naga HAOKAPHOK 14 Bible Online

HAOKAPHOK 14 - Tangkhul Naga bible

HAOKAPHOK 14

¹Shinarwui awunga Amraphel, Ellasarwui awunga Arioch, Elamwui awunga Ched-or-laomer kala Goiimwui awunga Tidal, athumwui thotli,

²athumna Sodomwui awunga Birsha, Admahwui awunga Shinab, Zeboiimwui awunga Shemeber kala Bela (kaja Zoar)wui awunga athumli rai ngarara.

³Athum saikorawui khangaruma raimi, Siddim Leiwuk (chiya, Salt Sea) li vākazipsera.

⁴Zingkum tharāda khani athumna Ched-or-laomerwui azingli pamsai, kha tharāda kakathuma kum ali rai sāphokhaowa.

⁵Tharada khamate kum Ched-or-laomerna kala awui ngasotnao wungnaobingli thānda Ashteroth-karnaimli khalei Rephaimnaoli, Hamli khalei Zuzimnaoli, Shaveh-kiriathaimli khalei,

⁶kala El-paran lamhāngwui amarei vāshungda khalei Seir Kaphungwui Horbingli rai yuihaowa;

⁷chiwui thili athumna hanungda Enmishpat (chiya, Kadesh), kala Amalekbingwui ngalei saikora, kala Hazazon-tamarli khalei Amorbinglila yuiserhaowa.

⁸Chiwui thili Sodomwui awunga, Gomorrahwui awunga, Admahwui awunga, Zeboiimwui awunga, kala Bela, (chiya, Zoar)wui awunga athum phangā ngarumda Siddimwui tampākli,

⁹Elemwui awunga Ched-or-laomer, Goiimwui awunga Tidal, Shinarwui awunga Amraphel, kala Ellasarwui awunga Arioch athum matili rai sai.

¹⁰Chitharān Siddimwui Tampāk hiya bitumen khewui chomna pemsai. Chieina Sodom eina Gomorrahwui awunga khani china khayām chitharān mi kaikha chili tāzanghaowa; kataibing chiya phungreili yāmkāhaowa.

¹¹Chithāda yangkashibingna Sodom eina Gomorrahwui ot saikora ngaponkhuida unghaowa;

¹²Abramwui agatowui naomayara Lotla chili pamsāhaoda awui lan eina ngasoda ali khuithuirumhaowa.

¹³Mi akha yāmshokta Hebrewpā Abramli pao unghānga, ana Eshcol eina Anerwui achinā Amorwui Mamrewui shirimthing ngalemli pamsai, athum hi Abramli khavak sāda leisai.

¹⁴Abramna awui theisāli tukthuihaira da kashā eina awui shimkhurli pharākasang ana tamchitheikazak kahai mi shākathum tharāda chishat thānlaga Dan shangshungda kharomvai.

¹⁵Kala ana ngayāshong awui raimibing ngayarlaga, a eina awui raobingna kasham-khayānglaga Damascuswui atungshong khalei Hobahli kharomshanga.

¹⁶Chithāda awui theisā Lot, awui lan, sha̱naobing kala mi saikorala akhuiluishita.

¹⁷ Ched-or-laomer kala ali khangaso awungabingli yuihaida Abramna latkhaung chitharān, Sodomwui awungana Shaveh Leiwuk (chiya Awungawui Leiwuk)li angaroka.

¹⁸Kala Salemwui awunga Reikhamataia Varewui pāngmon Melchizedekna khamui eina drakhāra̱ khuivāngaroka;

¹⁹kala ana somida hānga, “Kazing ngalei kasā Juikhamataia Varena Abramli somiranu;

²⁰kala nali yangkasheli nawui pāngli sangkhame Juikhamataia Vare chili sochikatranu!” Kala Abramna ot kachiva̱ khum tharāwui akha chi ali mi.

²¹Kala Sodomwui awungana Abramli hānga, “Mibing hiya ili milu, kha otbing chiya na jihaolu.”

²²Kha Abramna Sodomwui awungali hānga, “Reimeikap kaje kazingram eina okathui kasāa PROHO Vareli ina shākhi sāhaira,

²³kaja kazaira̱nao akha eina tangda kala pheihop khara̱nao eina tangda, nawui ot akhala makhuimara, kaja nana ‘Abramli ina shāngkhangasakna’ jipaishina.

²⁴I khikha makhuimara, kha iwui mibingna zākahai kala ili khangasobingwui yar milu; Aner, Eshcol, kala Mamre athumna athumwui yar khuiranu.”