Read Tangkhul Naga HAOKAPHOK 15 Bible Online

HAOKAPHOK 15 - Tangkhul Naga bible

HAOKAPHOK 15

¹Hiwui thili Abramli PROHOwui tui chi rāmahāmida hānga, “Mangacheealu Abram, I nawui chāngveina; nawui sāman chungmatailakra.”

²Kha Abramna hānga, “O PROHO VARE, nana ili khi minikhala, kaja I nao maleichingrangli, iwui shimlui kakhui chi Damascuswui Eliezarrala?”

³Abramna hānga, “Yanglu, nana ili naothei mamimana; kala iwui shimli pharākasang raonaona shimlui khuihaorali.”

⁴ Kala yanglu, PROHOwui tuina ali rāhāngluishita, “Mi hina nawui shimlui makhuimara; kha nakhalattawui naona khuira.”

⁵ Kala ana ali ayarshong thānshokta hānga, “Kazingramshong yangkālu; nana sirabing chi shānkhuishapakha shānkhuilu.” Chieina ana hānga, “Nawui naotunla chiyākhara.”

⁶ Ana PROHOli shitsanga; kala chiwui vang ali khamashung khangaronga da shānkhui.

⁷Kala PROHOna ali hānga, “Ngalei hi nawui ngasā khavai Chaldeawui Ur eina thānkashoka PROHO chi ilaka.”

⁸Kha ana hānga, “O PROHO VARE, hi ina samphangra kaji ina kathāda theirakhala?”

⁹Ana hānga, “Kum kathumwui muklānao akha, kum kathumwui me avā akha, kum kathumwui yaovānao akha, nāsha̱ akha kala kha̱na̱ akha da ili khuirāmilu.”

¹⁰Chieina ana khuivāsera, kala kaikhanini sālaga akhawuitungli akha ngashomda hai, kha vānaobing chiya mangakaimana.

¹¹Khalāng sāshaana sā kathipam chili yongkharā eina Abramna kashamhaowa.

¹² Zimik tunnanai Abram piphuphaowa, kala yanglu, khangachee tangmangting kahai akha Abramli rāshunga.

¹³ Chieina PROHOna Abramli hānga, “Theikazaklu, kaja nawui ara̱-azāna kha̱mi sāda athumwui lam makhaningli zatta miwui raonao sāra, kala athumli zingkum shāmati rekharekra,

¹⁴ kha athumna otram ngatha̱khami yur chiwuitungli iwui khamashung bichar tāshungra, kala athumna lan kachungkha khuiphungda shokluira.

¹⁵Nava chingri eina nashāvā ngarāwui ngalemli vāra; rarlak kahai atamli mathālak eina chifara.

¹⁶Athumna mithot khamateli hili latungluira, kaja Amornaobingna morei kasā makāshungranga.”

¹⁷Zimik tunhaida tangmang kahai tharān meikhut kashoka meiham akha kala meiwon kakā zarmei akha kashuirak shokta ngakai kahai sākhumbing chiwui ngachaili kānvāhaowa.

¹⁸ Chithang PROHOna Abramli tuingashit akha sāda hānga, “Nawui naotunbingli Egyptwui kong eina thuilaga kahaka Euphrates kong vāshungda ina khamina,

¹⁹chiya chiwui alungli khalei Ken, Keniz, Kadmon,

²⁰Hit, Periz, Rephaim,

²¹Amor, Canaan, Girgash kala Jebusbingwui ngalei china.”