Read Tangkhul Naga HAOKAPHOK 16 Bible Online

HAOKAPHOK 16 - Tangkhul Naga bible

HAOKAPHOK 16

¹Chitharān Abram preiva̱ Sarai nao mapharāthuwa. Awui rao Egyptwui sha̱nao akha Hagar hoda leisai;

²kala Saraina Abramli hānga, “Yanglu, PROHOna ili nao shummihaira; chieina iwui raosha̱nao hili ngasoakha awui eina ina nao samphangpaira.” Chieina Abramna Saraiwui tui nganai.

³Chithāda sāda Abramna Canaan ngaleili kum tharā sompam kahaiwui thili, apreiva̱ Saraina awui rao Egyptpava̱ Hagar hi agahara Abramwui preiva̱ sākhavai mihaowa.

⁴Abramna Hagarli ngasopida nao vaihaowa; kala nao vaihaira da kathei eina akhavaiva̱li matheimithuwa.

⁵Kala Saraina Abramli hānga, “Ili khayon kasā saikora nali tāranu! Iwui rao nali ngaso khavai mi, kha ara nao vaihaira da kathei eina ana ili matheimithura. PROHOna iniwui ngachaili bichar sāranu.”

⁶Kha Abramna Saraili hānga, “Yanglu, nawui raopava̱ hi nawui pāngli lei; nawui ningkachāng athishurda ali sālu.” Chieina Saraina ali sāshilak eina sāda Hagar yāmhaowa.

⁷Shurwui shongfashong lamhāng akhali, ura̱ khaleipam akhali PROHOwui kazingraona ali samphanga.

⁸Kala ana hānga, “Saraiwui rao sha̱nao Hagar, na kachiwui eina rāda kachili vāki kajikhala?” Hagarna ngahānkai, “Ishachon Saraiwui eina yāmkazatna.”

⁹PROHOwui kazingrao china ali hānga, “Latungda nachonwui kahāng nganālu.”

¹⁰Kazingrao china hānglui, “Ina nawui ara̱-azā kachungkha mataisangmida athum mashānkhararra ngasāra.”

¹¹Kazingrao china hithādala hānglui, “Yanglu, na nao vaida lei, kala mayarnao akha pharāra; awui ming Ishmael hora; kaja PROHOna nawui kachotkachāng chi theimihaira.

¹²Ava mi akhawui sakashe gadhā thāra, mi kachiva̱na ali mamayāmara, kala ana mi kachiva̱li mamayāmara, kala ana athei-asā khipalikha mamayā ngarokla okthuira.”

¹³Chiwui vang ana ali khangazeka PROHO wui aming chi “Na Katheia Varena” da hoi, kaja ana hānga, “Ina Vareli imik eina theikachangkhathailaga ali theikahaiwui thilila I ringfa kajila?” da hānga.

¹⁴Chiwui vang ra̱khong chili Beer-lahai-roi da hoi, hi Kadesh eina Beredwui ngachaili lei.

¹⁵ Hagarna Abramli naomayarnao akha pharāmi; kala Hagarna kapharā Abramwui naomayara chili Ishmael hoi.

¹⁶Hagarna Abramwui naomayara Ishmael kapharā tharān Abram kum hangchishatta tharuk kāhairasai.