Read Tangkhul Naga HAOKAPHOK 17 Bible Online

HAOKAPHOK 17 - Tangkhul Naga bible

HAOKAPHOK 17

¹Abram kum hangchikoda chiko kākashung tharān PROHOna rāchitheida hānga, “I Sashap-pangshapa Varena; iwui mangāli zatlu, kala shāt makā ngasakalu.

²Kala ina iniwui alungli iwui tuingashit sāra, kala nali sorngasaida mataisangmira.”

³Chieina Abramna ngaleili ngakhumzanga, kala Varena ali hānga,

⁴“Yanglu, iwui tuingashit nali ngasomida lei, nana shānda makakhui yurwui avāva̱ ngasāra.

⁵ Nawui ming Abram maholuimara, kha Abraham hohaora; kaja ina nali shānda makakhui yurwui avāva̱ sāngasakhaira.

⁶Ina nali sorngasaida athei mathei ngasakta yur kachungkha kala wungnao kachungkha nawui eina shokra.

⁷ Kala iwui khangashit katang makhavai tuingashit akha sāda na eina nawui ara̱-azābingwui thot vāshungda ina mayonmira, nawui kala nawui ara̱-azābingwui Vare sāchingra.

⁸ Kala nana zatta khalei Canaan ngalei hupta katang mavaila nawui kala nawui ara̱-azābingwui ngasā khavai mira, kala ina athumwui Vare sāra.”

⁹Kala Varena Abrahamli hānga, “Nala kala nawui thili kharā ara̱-azābingla athumwui mithot peida iwui tuingashit mayonra.

¹⁰ Hi I eina na kala nawui thili rāki kaji ara̱-aza̱bingwui ngachaili mayonki kaji tuingashit china: Nathumwui alungli mayarnao kachiva̱ ahui rimshokra.

¹¹ Nawui phasā ahui rimshokra, I eina nawui ngachaili china tuingashitwui machut sāra.

¹²Nathumwui alungli pharāda chishatthang kāshung kahaiya mayarnao, nawui shimkhurli kapharāranu, nawui theisā makhaning pheisā eina yur khangateiwui nao lokakhuiranu, mithot peida ahui rimshokserra,

¹³nawui shimkhurli kapharāranu, nawui pheisā eina lokakhuiranu, rimshokphalungra. Chithāda sāda iwui tuingashit hi naphasāli katang makhavai tuingashit sāda leichingra.

¹⁴Ahui marimkashoka mayarnao, chile awui yurwui eina katatphalungra; ana iwui tuingashit sākakhaina.”

¹⁵Kala Varena Abrahamli hānga, “Napreiva̱ Saraiwui vanga, nana awui ming Sarai maholuimara, kha Sarah [1] hohaora.

¹⁶Ina ali somira, kala chili lāngda awui eina ina nali naomayara akha mira; ina ali somira, kala ana miyur kachungkhawui ava̱va̱ sāra; awui eina miyur kachungkhawui awungabing shokra.”

¹⁷Chieina Abrahamna ngakhumzangda mana̱da akhalatta hānga, “Kum shākha kāshung kahai mi akhana nao pharārala? Kum hangchiko kāshung kahaiva̱ Sarahna nao leirala?”

¹⁸Kala Abrahamna Vareli hānga, “O Ishmaelna nawui mangāli okthuichingranu!”

¹⁹Varena hānga, “Maningmana, kha napreiva̱ Sarahna nali nao mayarnao akha pharāmira, kala nana awui ming Isaac hora. Ali kala awui ara̱-azābingli mashimānla iwui tuingashit hi leingasakchingra. [2]

²⁰Ishmaelwui pongli ina nawui tui shāhaira; yanglu, ina ali somira kala ali athei mathei ngasakra kala kachungkha mataisangmira; ana wungnao tharāda khaniwui avāva̱ ngasāra, kala ina ali kahaka yur akha sāngasakra.

²¹Kha iwui tuingashitva Sarahna zingkuma hitharan pharāki kaje nawui nao Isaacli sāra.”

²²Chān ngazek khuihailaga Varena Abrahamwui eina thuihaowa.

²³Chiwui thili Abrahamna anaomayara Ishmael kala awui shimli pharākasang raobing kala lupā eina lokakhui raonaobing saikora Varena kakaso athishurda chithang ngalāngda ahui rimshokmi.

²⁴Abrahamna ahui rimkashok chitharān a kum hangchikoda chiko kāshunghairasai.

²⁵Kala anaomayara Ishmaelna ahui rimkashok tharān kum tharāda kathum kāshunghairasai.

²⁶Chithang Abraham eina awui nao Ishmael ahui rimshokhaowa;

²⁷kala ashi shimkhurli kapharā, kala yur kateiwui eina lokakhui mayarnao saikora ali ngasoda ahui rimshoksera.