Read Tangkhul Naga HAOKAPHOK 18 Bible Online

HAOKAPHOK 18 - Tangkhul Naga bible

HAOKAPHOK 18

¹Mamrewui shirimthingpamli, ngashunshong sāhaida, awui kachonshim khāmongli pamlakha PROHOna Abrahamli rāchithei.

² Ana kapeikakā eina, yanglu mi kathum awui mangāli nganingkasā thei. Ana athumli kathei eina totot angakhumzanga,

³kala hānga “Iwui amei, I hi nathumna ngahānkhangaia mi akhana jiakha narao ili mamakānthuimihaialu.

⁴Tara̱nao khuirāmiranu, phei pheolaga thingphei khaya̱li ngasāmkhuisālu,

⁵naraowui shimli rāhaokada ina kashakazā ngahomkha ungkhuimiga, chiwui thili nathum thuinaolu.” “Nana kahāng thāda sālu” da athumna hānga.

⁶Chieina Abrahamna kachonshimli totot yongungda Sarahli hānga, “Mathir khamathā nailaga mi kathumwui vang khangarān sālu.”

⁷Kala Abrahamna totot seishangli vālaga asā kakā seinao akha khuida awui raoli khuimi, kala ana totot hangmi.

⁸Chiwui thili ana seina̱khan, seina̱, kala ana hangkahai sā chi athumli khuivāmi; kala athumna zālakha ana thingpheili nganingpama.

⁹Athumna ali ngahāna, “Napreiva̱ Sarah kali leilikhala?” Ana, “Shimlungli leili” da ngahānkai.

¹⁰ PROHOna hānga, “Ina mashoila mayokachāng rāluira, kala napreiva̱ Sarahna naomayarnao akha samphangra.” Sarahna awui khanukli kachonshimwui khāmongli nganāpamsai.

¹¹Chitharān Abraham eina Sarah sarlākhairasai; Sarah naotheila chathairasai. Sha̱naowui khangachāla ngasāmhairasai.

¹² “Ila, igaharala sarhaira, kathāda ina nao pharāda ringkaphā samphangrakhala?” da awui ningli ngathumda mana̱ya.

¹³PROHOna Abrahamli hānga, “Khisāda Sarahna mana̱da, ‘I nao vaikachangluirala, ara sarhaira’ jikhala?

¹⁴ PROHOwui vang sakkhanā khi leikhala? Hāngkahai atam mayokachāng ina rāluira, kala Sarahna naomayara akha samphangra.”

¹⁵Kha Sarahna, “I mamana̱mana” da hānga, kaja a ngacheehaowa. Ana hānga, “Maningmana, na mana̱ya.”

¹⁶Chiwui thili athumna zatphokta Sodomshong ngashānvai; kala Abrahamna athumli shongfali athai.

¹⁷PROHOna hānga, “Ina sāki kaji chi Abrahamli mahāngla ngathumhaorala,

¹⁸ kaja Abraham hi pangshap khalei kahaka yur akha ngasāra kala awui vang eina okathui miyur saikora sokhami ngasāra kaji thatheilaga?

¹⁹Maningmana, kaja awui naongarāli, kala awui shimkhurli anaolamshong eina tangda kathar eina khamashung eina PROHOwui shongfali zatkhavai kala PROHOna ngashitmi kahai chi Abrahamna samphang khavai ali kapangkhui kahaina.”

²⁰Chiwui thili PROHOna hānga, “Sodom eina Gomorrahwuitungli kakhalop marnāhaira, kala athumwui morei hakmahālakhaira,

²¹athumli khamatui ina kashā saikora chi athumna sākachangkhatka kathākhala kaji ina tāyanglaga theira.”

²²Chieina mibing chiwui eina mai ngareida Sodomshong tāhaowa, kha Abrahamna PROHOwui mangāli nganingpama.

²³Kala Abrahamna anganaida ngahāna, “Khamashunga athumlila makaphā athumli ngasoda shimān ngasakrala?

²⁴Chānjam sāda keinung chiwui alungli kathara mi hangphangā leisasi kaja, athum kathara hangphangā chiwui vang keinung chi mayangmila shimān ngasakrala?

²⁵Khatharabingli makaphābing eina ngasoda shaokathat, kaja katharbingla makaphābingwui kashimānli zangkhangasak chi nawui eina katāva̱li leiranu! Okathui katongawui Bichar akhavāna mashun bichar masāmarala?”

²⁶Chieina PROHOna hānga, “Sodomwui alungli kathara mi hangphangā leisaakha athumwui mangā eina ina keinung katonga huimira.”

²⁷Abrahamna ngahānkai, “Yanglu, ina PROHOli chān ngazekrada ngazekta lei, kha iva chifa eina hotlāna.

²⁸Chānjam sāda hangphangā chiwui ngachaili phangā vātsasi kaja, phangā khavāt chiwui vang nana keinung katonga shimān ngasakrala?” Ana ngahānkai, “Hangmatida phangāmāng leisālala ina mashimān ngasakmara.”

²⁹Abrahamna ngahānluishita, “Chānjam sāda hangmatimāng leisasi kaja kathāra?” Ana ngahānkai, “Hangmati chiwui vang mashimān ngasakmara.”

³⁰Chieina ana hānga, “PROHOna malung mavātmiranu, ina akha hāngluiga, chānjam sāda thumrāmāng leisāsi kaja kathara?” Ana ngahānkai, “Thumrāwui mangā eina ina mashimān ngasakmara.”

³¹Ana hānga, “Yanglu, ina PROHOli ngazekrada khangazekna. Chānjam sāda maga̱ leisasi kaja kathara?” Ana ngahānkai, “Maga̱ chiwui mangā eina ina mashimān ngasakmara.”

³²Chiwui thili ana hānga, “PROHOna malung mavātmiranu; akhamāng hānghaoga, chānjam sāda tharā leisasi kaja kathara?” Ana ngahānkai, “Tharā chiwui mangā eina ina mashimān ngasakmara.”

³³Abrahamli ngazekkhui kahaiwui thili PROHOna thuihaowa, kala Abrahamna awui apamli latunghaowa.